PM Narendra Modi : लोकसभा निवडणुकीसाठी मतदानाचा तिसरा टप्पा (Loksabha Election 2024 3rd Phase) आज (7 मे) पार पडत आहे. त्यामुळे आज अनेक दिग्गजांचं भवितव्य ईव्हीएममध्ये कैद होणार आहे. आज महाराष्ट्रातील 11 जागांवर आज मतदान पार पडणार आहे. यामध्ये सातार, कोल्हापूर, बारामती, सोलापूर, रायगड, उस्मानाबाद, सांगली, लातूर, माढा, रत्नागिरी-सिंधुदुर्ग आणि हातकणंगले या जागांवर मतदान पार पडणार आहे. यासोबतच उत्तर प्रदेशात 10, गुजरातमध्ये 25, मध्य प्रदेशातील 9, कर्नाटकातील 14, छत्तीसगडमधील 7, आसाममधील 4, बिहारमधील 5, पश्चिम बंगालमधील 4, गोव्यातील 2 आणि दादर नगर आणि दमण दीव या केंद्रसशासित प्रदेशातील प्रत्येकी एका जागेवर मतदान पार पडणार आहे.
आता मतदानाला सुरूवात झाली असून कित्येक उमेदवार मतदानासाठी केंद्राकडे निघाले आहे. यामध्ये पंतप्रधान नरेंद्र मोदी देखील मतदानासाठी अहमदाबादमध्ये दाखल झाले आहेत. मतदान करण्यापूर्वी पंतप्रधान मोदींनी जनतेला मतदना करण्याचं आवाहन केलं आहे.
पंतप्रधान मोदींनी ट्विट करत म्हटलं आहे की, “आजच्या टप्प्यात मतदान करणाऱ्या सर्वांना विक्रमी संख्येने मतदान करण्याचे आवाहन करतो. तुमच्या सक्रिय सहभागामुळे निवडणुका नक्कीच अधिक उत्साही होतील”, असे पंतप्रधान मोदी म्हणाले.
दरम्यान, आज होणाऱ्य़ा तिसऱ्या टप्प्यातील मतदानामध्ये फक्त राज्यातीलच नाही तर देशातील अनेक बड्या नेत्यांची प्रतिष्ठा पणाला लागणार आहे. यामध्ये उदयनराजे भोसले, सुप्रिया सुळे, सुनेत्रा पवार, धैर्यशील मोहिते-पाटील, नारायण राणे, सुनिल तटकरे, प्रणिती शिंदे, छत्रपती शाहू महाराज, अमित शाह, शिवराज सिंह चौहान अशा अनेक बड्या नेत्यांचं भवितव्य आज ईव्हीएममध्ये कैद होणार आहे.
