पंतप्रधान नरेंद्र मोदी यांनी आज उत्तर प्रदेशमधील वाराणसी लोकसभा मतदारसंघातून आपला उमेदवारी अर्ज भरण्यापूर्वी वाराणसीतील गंगेच्या काठावर दशाश्वमेध घाटावर प्रार्थना केली आणि घाटावर गंगा आरतीमध्येही सहभाग घेतला. त्यानंतर पीएम मोदी काल भैरव मंदिरात पूजा करणार आहेत.
पीएम मोदी विद्यमान खासदार आणि भाजपचे उमेदवार 2024 च्या सार्वत्रिक निवडणुकीसाठी वाराणसी लोकसभा मतदारसंघातून आपला उमेदवारी अर्ज दाखल करतील, जिथून त्यांनी मागील सलग दोन वेळा मोठ्या फरकाने विजय मिळवला आहे.
पंतप्रधान मोदी वाराणसीतून तिसऱ्यांदा निवडून येण्याची अपेक्षा करत आहेत .सार्वत्रिक निवडणुकीच्या सातव्या आणि शेवटच्या टप्प्यात वाराणसीमध्ये १ जून रोजी मतदान होत आहे.
पंतप्रधान मोदींच्या नामांकनापूर्वी वाराणसीतील जिल्हा दंडाधिकारी कार्यालयाबाहेर सुरक्षा बळकट करण्यात आली आहे. भारतीय जनता पक्षाने X वर हिंदीतील एका पोस्टमध्ये म्हटले आहे की काशी मंदिर पुन्हा एकदा आपला सेवक (पीएम मोदी) संसदेत पाठवण्यास तयार आहे. “मी इथे आलो नाही ना कोणी मला इथे पाठवले आहे, माँ गंगा ने मला बोलावले आहे… काशी, काशीवासी आणि हा मुख्य सेवक यांच्यातील हे नाते विकास, विश्वास आणि आपुलकीचे आहे. काशी पुन्हा एकदा विक्रमी मतांनी विजयी करूनआपल्या मुख्य सेवकाला संसदेत पाठवण्यास उत्सुक आहे”.असे पंतप्रधानांचे मनोगत भाजपने आपल्या एक्स पोस्ट मधून व्यक्त केले आहे.
पीएम मोदींनी वाराणसी शहराशी असलेल्या त्यांच्या नात्याबद्दल X वर पोस्ट देखील केले. “माझ्या काशीशी असलेले माझे नाते अप्रतिम, अविभाज्य आणि अतुलनीय आहे… मी एवढेच म्हणेन की ते शब्दात व्यक्त करता येत नाही!”
लोकसभा निवडणुकीच्या सातव्या आणि शेवटच्या टप्प्यात वाराणसीमध्ये १ जून रोजी मतदान होणार आहे.काल संध्याकाळी पीएम मोदींनी वाराणसीमध्ये पाच किलोमीटरचा एक भव्य रोड शो केला.
पंतप्रधान मोदींसोबत उत्तर प्रदेशचे मुख्यमंत्री योगी आदित्यनाथ आणि भाजपचे प्रदेशाध्यक्ष चौधरी भूपेंद्र सिंह होते. पंतप्रधानांचा जयजयकार करण्यासाठी रस्त्याच्या दुतर्फा समर्थक आणि रहिवाशांचा मोठा जमाव जमल्याने संपूर्ण परिसर ‘हर हर महादेव’ आणि ‘जय श्री राम’च्या जयघोषाने दुमदुमून गेला.
पंतप्रधान नरेंद्र मोदी यांनी संध्याकाळी ५ वाजता काशी हिंदू विद्यापीठाच्या सिंह द्वार येथे महामना मदन मोहन मालवीय यांच्या पुतळ्याला पुष्पहार अर्पण करून त्यांच्या रोड शोला सुरुवात केली. तब्बल अडीच तासांनंतर काशी विश्वनाथ धाम येथे रोड शोचा समारोप झाला. रोड शोनंतर पंतप्रधानांनी मुख्यमंत्री योगी आदित्यनाथ आणि इतर भाजप नेत्यांसह काशी विश्वनाथ धाम येथे प्रार्थना केली.
वाराणसी हा भारतीय जनता पक्ष आणि पंतप्रधान मोदींचा बालेकिल्ला आहे. 2014 आणि 2019 च्या लोकसभा निवडणुकीत त्यांनी दोनदा जागा जिंकली. काँग्रेसने उत्तर प्रदेश काँग्रेसचे प्रमुख अजय राय यांना वाराणसीमध्ये पंतप्रधान मोदींच्या विरोधात उभे केले आहे. अजय राय हे तिसऱ्यांदा लोकसभा लढतीत पंतप्रधान मोदींशी भिडणार आहेत.
2019 च्या लोकसभा निवडणुकीत, PM मोदींनी 6,74,664 पेक्षा जास्त मतांसह जागा जिंकली आणि 63.6 टक्के मतांची कमाई केली होती . तर 2014 मध्ये, पंतप्रधान मोदींनी गुजरातच्या वडोदरा आणि उत्तर प्रदेशच्या वाराणसीमधून लोकसभेच्या दोन जागा लढवल्या होत्या आणि जिंकल्या होत्या.
