PBKS vs RR : आयपीएल 2024 च्या 65 व्या सामन्यात राजस्थान रॉयल्स आणि पंजाब किंग्स यांच्यात चुरशीचा सामना पार पडला. तर कालच्या या सामन्यात पंजाब किंग्सने राजस्थान रॉयल्सचा त्यांच्या घरच्या मैदानावरच पराभव केला.
राजस्थान रॉयल्सने नाणेफेक जिंकून प्रथम फलंदाजी करण्याचा निर्णय घेतला. यावेळी राजस्थानने प्रथम फलंदाजी करताना 20 षटकांत 9 गडी गमावून 144 धावा केल्या. तर संघाकडून रियान परागने सर्वाधिक 48 धावा केल्या आणि आर अश्विनने 28 धावांचे योगदान दिले. राजस्थान संघाची सुरुवात खूपच खराब झाली. यशस्वी जैस्वाल पहिल्याच षटकात बाद झाला. सॅमसन आणि टॉम कोहलरने प्रत्येकी 18 धावांचे योगदान दिले. पाच फलंदाजांना दुहेरी आकडाही गाठता आला नाही.
प्रत्युत्तरात पंजाब किंग्स संघाचा कर्णधार सॅम करनने पाच चौकार आणि तीन षटकारांसह नाबाद 63 धावा केल्या. सॅम करनच्या अर्धशतकाच्या जोरावर पंजाब किंग्जने हा सामना 5 गडी राखून जिंकला. तर राजस्थानचा हा सलग चौथा पराभव आहे. मात्र, राजस्थानचा संघ आधीच प्लेऑफसाठी पात्र ठरला आहे.
