लोकसभा निवडणुकीचा प्रचार जोरात सुरु आहे. देशभरात इंडिया आघाडी आणि एनडीए कडून मोठ्या प्रमाणात प्रचार सभा घेत आहेत. पंतप्रधान नरेंद्र मोदी आणि भाजपाचे स्टार प्रचारक तसेच इंडिया आघाडीचे स्टार प्रचारक देशभरात सभा घेत आहेत. दरम्यान आतापर्यंत ४ टप्प्यातील मतदान पूर्ण झाले आहे. आता ५ व्या टप्प्यातील मतदान २० मे रोजी होणार आहे. देशातील ६ राज्ये आणि २ केंद्रशासित प्रदेशातील ४९ जागांवर मतदान होणार आहे.
महाराष्ट्रात १३ जागांवर २० मे रोजी मतदान होणार आहे. राज्यात धुळे, नाशिक, पालघर, दिंडोरी, भिवंडी, कल्याण, ठाणे तसेच मुंबईत उत्तर पश्चिम, मुंबई उत्तर, मुंबई ईशान्य, मुंबई उत्तर मध्य, मुंबई दक्षिण मध्य आणि दक्षिण मुंबई या जागांवर मतदान होणार आहे. ५ व्या टप्प्यात अनेक केंद्रीय मंत्री, नवखे उमेदवार यांचे भवितव्य EVM मध्ये बंद होणार आहे.
दरम्यान देशभरात पंतप्रधान नरेंद्र मोदी, अमित शाह, युपीचे मुख्यमंत्री योगी आदित्यनाथ यांनी एनडीएच्या प्रचारासाठी सभा घेतल्या आहेत. संरक्षणमंत्री राजनाथ सिंह, नितीन गडकरी अशा स्टार प्रचारकांनी देखील देशभरात एनडीएच्या उमेदवारांसाठी प्रचार सभा घेतल्या आहेत. दरम्यान ५ व्या टप्प्यासाठी आज प्रचाराच्या तोफा थंडावणार आहेत.
