CSK vs RCB : काल झालेल्या IPL 2024 च्या 68 व्या सामन्यात हाय व्होल्टेज ड्रामा पाहायला मिळाला. या थरारक सामन्यात रॉयल चॅलेंजर्स बंगळुरूने चेन्नई सुपर किंग्जचा 27 धावांनी पराभव करत प्लेऑफमध्ये आपले स्थान निश्चित केले. या दमदार विजयानंतर आरसीबीचा स्टार फलंदाज विराट कोहलीला आपल्या भावनांवर नियंत्रण ठेवता आले नाही आणि विजयाच्या आनंदात त्याचे डोळे पाणावले होते.
आरसीबी प्लेऑफमध्ये पोहोचताच चिन्नास्वामी स्टेडियममध्ये विराट कोहलीने एकच जल्लोष केला. तर स्टेडियममध्ये उपस्थित पत्नी अनुष्का शर्मानेही विराटला प्रोत्साहन दिले. सध्या विराट-अनुष्काचा हा व्हिडीओ सोशल मीडियावर मोठ्या प्रमाणात व्हायरल होत आहे.
शनिवारी RCB ने CSK चा पराभव करून प्लेऑफमध्ये प्रवेश केला तेव्हा विराट कोहलीचे डोळे भरून आले होते. विजयाच्या आनंदात तो धावत जाऊन आपल्या खेळाडूंना मिठी मारत होता पण यावेळी तो खूपच भावूक झाला होता.
एकिकडे आरसीबीने प्लेऑफमध्ये प्रवेश केला, मात्र दुसीकडे सीएसकेचा माजी कर्णधार एमएस धोनीचे मन दु:खी झाले होते. सीएसकेच्या पराभवानंतर त्यांचा संघ प्लेऑफच्या शर्यतीतून बाहेर पडला. माहीच्या चेहऱ्यावरून स्पष्ट निराशा दिसत होती. तसेच त्याने अद्याप आयपीएलमधून निवृत्तीची औपचारिक घोषणा केलेली नाही, मात्र या मोसमानंतर तो या स्पर्धेलाही अलविदा करेल अशी शक्यता वर्तवली जात होती.
