Neeta Ambani : आयपीएलचा 17वा हंगामात आता चार संघ प्लेऑफसाठी पात्र ठरले आहेत. यामध्ये हैदराबाद, कोलकाता, राजस्थान आणि बेंगळुरू हे संघ प्लेऑफसाठी पात्र ठरले आहेत. त्यामुळे आता मुंबई इंडियन्सचा प्रवास संपला आहे. मुंबई इंडियन्स संघाने यंदाच्या हंगामात हवी तशी चांगली कामगिरी केलेली नाही. त्यामुळे हा सीझन त्यांच्यासाठी काही खास राहिला नाही.
मुंबई इंडियन्स संघ गुणतालिकेत दहाव्या स्थानावर आहे. तर आता मुंबईच्या मालक नीता अंबानी यांनी संघाच्या कामगिरीबद्दल भाष्य केले आहे. त्याचा एक व्हिडिओ सध्या सोशल मीडियावर व्हायरल होत आहे ज्यामध्ये त्या ड्रेसिंग रूममध्ये खेळाडूंना संबोधित करताना दिसत आहे.
यावेळी नीता अंबानी म्हणाल्या, “आपल्या सर्वांसाठी हा एक निराशाजनक हंगाम आहे. आम्हाला पाहिजे तशा गोष्टी यंदा घडल्या नाहीत, परंतु मी अजूनही मुंबई इंडियन्सची खूप मोठी चाहती आहे. फक्त एक मालकच नाही. मला वाटते की मुंबई इंडियन्सची जर्सी घालणे खूप मोठी गोष्ट आहे. तसेच मुंबई इंडियन्सशी जोडले जाणे हा एक सन्मान आणि विशेषाधिकार आहे. त्यामुळे आम्ही परत जाऊन त्याबद्दल विचार करू.”
पुढे नीता अंबानी यांनी टी-20 विश्वचषक 2024 साठी निवडलेल्या भारतीय खेळाडूंचे अभिनंदनही केले. यावेळी त्यांनी रोहित शर्मा, हार्दिक पांड्या, सूर्यकुमार यादव आणि जसप्रीत बुमराह यांना आगामी विश्वचषकासाठी खास संदेश दिला. “रोहित, हार्दिक, सूर्या आणि बुमराह यांना विश्वचषकासाठी शुभेच्छा. आम्हाला आशा आहे की तुम्ही 2024 च्या T20 विश्वचषकात चांगली कामगिरी कराल”, असं नीत अंबानी म्हणाल्या.
https://x.com/mipaltan/status/1792056139896754574
दरम्यान, मुंबई इंडियन्सने आयपीएल 2024 मध्ये 14 पैकी फक्त चार सामने जिंकले आहेत. त्यांचा नेट रन रेट (-0.318) देखील या मोसमात सर्वात वाईट होता.
