Pune Porsche Accident : पुण्यातील कल्याणीनगर परिसरात झालेल्या कार अपघात प्रकरणात एक मोठी अपडेट समोर आली आहे. अल्पवयीन आरोपी मुलाचे वडील विशाल अग्रवाल आणि अपघातादरम्यान कारमध्ये उपस्थित असलेल्या मित्रांनी एक खळबळजनक दावा केला आहे. अपघातावेळी कार आरोपी मुलगा नाही तर ड्रायव्हर चालवत होता, असा दावा त्यांनी केला आहे.
सध्या विशाल अग्रवाल हा पुणे पोलिसांच्या ताब्यात असून त्याची चौकशी सुरू आहे. या चौकशीदरम्यान अपघातावेळी मुलगा नाही तर फॅमिली ड्रायव्हर कार चालवत होता, अशी माहिती त्याने पोलिसांना दिली आहे. तसेच या अल्पवयीन मुलाच्या मित्रांनी देखील हाच जबाब दिला आहे.
तसेच ड्रायव्हरने देखील मीच ती कार चालवत होतो, असे पोलिसांना दिलेल्या जबाबात कबूल केले आहे. ड्रायव्हरने आधीच्या जबाबात हाच दावा केला होता की, ही दुर्घटना घडली तेव्हा कार तोच चालवत होता. तसेच आताही पोलिसांनी केलेल्या चौकशीदरम्यान या ड्रायव्हरने पुन्ही हीच कबूली दिली आहे.
या जबाबानंतर आता पोलिसांनी ज्या रस्त्यावर हा अपघात झाला त्या संपूर्ण रस्त्याचे सीसीटीव्ही फुटेज गोळा केले आहेत. पोर्शे कार नेमकं कोण चालवत होतं? हे जाणून घेण्यासाठी पोलिसांकडून सीसीटीव्ही चेक करण्यात येत आहे.
