”राहुल गांधींच्या संमतीशिवाय हे होऊ शकते का?…”; अय्यर यांच्या विधानावर भाजपाची जोरदार टीका 

सध्या लोकसभा निवडणुकीत सत्ताधारी आणि विरोधक यांच्याकडून देशभरात
जोरदार प्रचार करण्यात येत आहे. लोकसभेसाठी ७ व्या म्हणजेच अखेरच्या टप्प्यातील
मतदान बाकी राहिले आहे. ४ जून रोजी या देशात इंडिया आघाडीचे सरकार येणार की,
एनडीए
तिसऱ्यांदा सरकार बनवणार हे स्पष्ट होणार आहे. मात्र निवडणुकीचा कार्यक्रम सुरु
असतानाच मणिशंकर अय्यर यांनी एक वादग्रस्त विधान केले आहे. त्यानंतर त्यांनी माफी
देखील मागितली आहे. मात्र त्यांच्या विधानाचा भाजपाने जोरदार समाचार घेतला आहे.

या प्रकरणात भाजपाने पत्रकार परिषद घेऊन आपली भूमिका स्पष्ट केली
आहे. भाजपच्या वतीने गौरव भाटिया म्हणाले, ”जवाहरलाल
नेहरूंच्या काळात चीनने भारताची ४३ हजार चौरस किलोमीटर जमीन ताब्यात घेतली होती.
ही जमीन अजूनही चीनच्या ताब्यात आहे. मणिशंकर अय्यर यांनी चीनला क्लीन चिट दिली.
राहुल गांधींच्या संमतीशिवाय हे होऊ शकते का? चीनचे गुणगान
गाणे आता बंद करावे. काँग्रेसच्या अध्यक्षांनी देखील याबाबतीत मौन बाळगले आहे.
मणिशंकर अय्यर यांचे विधान काँग्रेसची भारतविरोधी भूमिका प्रदर्शित करते.”