हिमाचल प्रदेशातील लोकसभेच्या चारही जागांवर भाजपच्या विजयाचा मार्ग मोकळा दिसत असला तरी राज्यातील विधानसभा जागांच्या पोटनिवडणुकीत भाजपला धक्का बसल्याचे दिसत आहे. राज्यातील सहा विधानसभा जागांवर झालेल्या पोटनिवडणुकीत भाजप चार जागांवर काँग्रेसपेक्षा पिछाडीवर आहे. राज्यातील लोकसभेच्या चारही जागांवर भाजपचा विजय जवळपास निश्चित आहे.
हिमाचल प्रदेशातील लोकसभेच्या चार जागांसाठी मंगळवारी सकाळी ८ वाजल्यापासून राज्यातील ७४ केंद्रांवर मतमोजणी सुरू आहे. आतापर्यंतच्या आकडेवारीनुसार, कांगडा लोकसभा मतदारसंघातून भाजपचे उमेदवार राजीव भारद्वाज हे काँग्रेसच्या आनंद शर्मा यांच्यावर २ लाख २६ हजार मतांनी आघाडीवर आहेत. त्याचवेळी हमीरपूर मतदारसंघातून भाजपचे उमेदवार अनुराग ठाकूर १ लाख ४७ हजार मतांनी आघाडीवर आहेत. मंडी मतदारसंघातून सिनेअभिनेत्री कंगना राणौतही काँग्रेसच्या विक्रमादित्य सिंह यांच्यापेक्षा ६२ हजार मतांनी पुढे आहे. तर, शिमला मतदारसंघातून भाजपचे सुरेश कश्यप 79 हजार मतांनी आघाडीवर आहेत.
त्याचवेळी विधानसभा पोटनिवडणुकीत धर्मशाला आणि बडसरमध्ये भाजपच्या उमेदवारांनी निर्णायक आघाडी घेतली आहे. त्याचबरोबर सुजानपूर, गागरेट आणि कुतलहाडमध्ये काँग्रेसचा विजय निश्चित दिसत आहे. येथे शेवटच्या फेरीत मतमोजणी सुरू असून काँग्रेसचे उमेदवार आघाडीवर आहेत. तर लाहौल स्पितीमध्येही काँग्रेस आता पुढे आहे.
