लोकसभा निवडणुकीचा निकाल जाहीर झाला असून नरेंद्र मोदी तिसऱ्यांदा भारताचे पंतप्रधान होणार आहेत. तसेच यावेळी एनडीएला बहुमतही मिळाले आहे. त्यामुळे सध्या एनडीएचे कार्यकर्ते आणि समर्थक मोठा आनंद साजरा करत आहेत. तर नरेंद्र मोदी हे तिसऱ्यांदा पंतप्रधानपदाची शपथ घेणार असल्यामुळे सध्या त्यांच्यावर फक्त भारतातूनच नाही तर अन्य देशातील दिग्गजांकडूनही कौतुकाचा वर्षाव होत आहे.
आता अमेरिकन गायिका आणि हॉलिवूड अभिनेत्री मेरी मिलबेन हिने पंतप्रधान मोदींचे अभिनंदन केले आहे. मेरी मिलबेनने X वर लिहिले आहे की, “माझ्या प्रिय भारतीयांनो, नमस्ते. आजचा दिवस भारत आणि जगासाठी ऐतिहासिक आहे. माझे मित्र पंतप्रधान नरेंद्र मोदी यांची पुन्हा निवड होणे ही नव्या भारताची सुरुवात आहे. पंतप्रधान मोदी, तुमची पुन्हा निवड झाल्याबद्दल तुमचे अभिनंदन करणारी मी अमेरिकेतील पहिला व्यक्ती आहे. मी तुमच्यासाठी खूप आनंदी आहे. तुम्ही भारताचे निवडून आलेले नेते आहात, ज्याला देवाने आणि नंतर भारताच्या लोकांनी निवडले आहे.”
“तुमच्या प्रदीर्घ कार्यकाळावर प्रश्नचिन्ह उपस्थित करणाऱ्या पाश्चिमात्य देशांना तुम्ही चुकीचे सिद्ध केले आहे. यूएस-भारत संबंध आणि जागतिक स्थिरतेसाठी तुम्ही सर्वोत्कृष्ट नेते आहात याची जगभरातून पुष्टी झाली आहे. मला आशा आहे की तुम्ही नेतृत्व करत असताना तुम्ही देवाचे दूत बनून राहाल. देवाच्या सेवेत तुम्ही भारतातील जनतेला निराश करणार नाही. 140 कोटी लोकांची सेवा करण्यासाठी तुमची निवड झाली आहे”, असे मेरी मिलबेन म्हणाली.
पुढे ती म्हणाली, “तुम्ही सर्वात लोकप्रिय देश आणि जगातील 5 व्या सर्वात मोठ्या अर्थव्यवस्थेवर राज्य करत असल्याने, तुमची नैतिकता तुम्हाला भारतासाठी जे योग्य आणि सर्वोत्तम आहे ते करण्यास नेहमीच प्रवृत्त करो. जगभरातील विविध देशांमध्ये शांतता प्रस्थापित करण्यासाठी तुम्ही जबाबदार असाल”, असं म्हणत मेरीने पंतप्रधान मोदींचे कौतुक केले.
दरम्यान, 2024 च्या लोकसभा निवडणुकीत भाजपच्या नेतृत्वाखालील एनडीएने 293 जागा जिंकल्या आहेत. तर भाजपने 240 जागा जिंकल्या आहेत. तसेच वाराणसीत पंतप्रधान मोदी विजयी झाले आहेत. या विजयानंतर पंतप्रधान मोदींनी देशाला संबोधित केले आणि त्यांनी दिलेल्या पाठिंब्याबद्दल त्यांचे आभार मानले.
