आखाती देश कुवेतमधील दक्षिणेकडील मंगफ शहरात आज अग्नितांडव पाहायला मिळालं. मंगफ शहरातील एका इमारतीला भीषण आग लागल्याची घटना आज घडली. या आगीत 5 भारतीयांसह 35 जणांचा होरपळून मृत्यू झाला आहे. याबाबतची माहिती कुवेतच्या अधिकृत वृत्तसंस्थेने आपल्या अहवालात दिली आहे.
आज पहाटे साडेचार वाजता लेबर कॅम्पच्या स्वयंपाकघरात भीषण आग लागली. ही आग लागताच काही जणांनी घाबरून आपल्या अपार्टमेंटमधून खाली उड्या मारल्या, ज्यामध्ये त्यांचा मृत्यू झाला. तर काही लोकांचा आगीत होरपळून मृत्यू झाला आहे.
मिळालेल्या माहितीनुसार, आग लागलेल्या संबंधित इमारतीत मोठ्या प्रमाणात मल्याळम लोक राहत होते. तर या घटनेत मृत पावलेल्यांमधील दोघेजण तामिळनाडू आणि उत्तर भारतातील असल्याचं सांगण्यात येत आहे. तर कुवेतच्या आरोग्य मंत्रालयाकडून मिळालेल्या माहितीनुसार, या घटनेतील सर्व जखमींना जवळच्या रूग्णालयात दाखल करण्यात आलं आहे.
