बहुचर्चित आणि बहुप्रतीक्षित ‘पुष्पा 2: द रुल’ या चित्रपटासाठी प्रेक्षकांना आणखी काही महिने वाट पाहावी लागणार आहे. गेल्या काही दिवसांपासून अल्लू अर्जुन, फहाद फासिल आणि रश्मिका मंदान्ना यांच्या ‘पुष्पा 2: द रुल’ची रिलीज डेट बदलण्याची चर्चा सुरु होती. अखेर चित्रपटाच्या प्रदर्शनाची तारीख बदलून ६ डिसेंबर करण्यात आल्याची अधिकृत घोषणा करण्यात आली आहे.आता ‘पुष्पा २: द रुल’ या चित्रपटासाठी प्रेक्षकांना दोन महिन्यांऐवजी तब्बल सहा महिने वाट पाहावी लागणार आहे.
सुकुमार दिग्दर्शित ‘पुष्पा 2: द रुल’ या चित्रपटाबद्दल प्रेक्षकांमध्ये प्रचंड उत्सुकता आहे. चित्रपटाचा टीझर आणि गाणी सुपरहिट झाली आहेत. विशेष म्हणजे ‘पुष्पा 2: द रुल’ मधील ‘पुष्पा-पुष्पा’ आणि ‘अंगारॉन’ या दोन गाण्यांनी प्रेक्षकांना खऱ्या अर्थाने वेड लावले आहे. ‘पुष्पा 2: द रुल’ची गाणी सध्या प्रत्येकाच्या ओठावर आहेत. मात्र निर्मात्यांनी चित्रपटाच्या प्रदर्शनाची तारीख बदलल्याची मोठी घोषणा केली आहे. यामागचे कारण मात्र काहीतरी वेगळेच आहे.
‘पुष्पा 2: द रुल’ या चित्रपटाच्या अधिकृत सोशल मीडिया पेजवर नवीन रिलीजची तारीख जाहीर करण्यात आली आहे. अल्लू अर्जुनच्या चित्रपटातील नवीन लूकचे पोस्टर शेअर करताना त्याने लिहिले की, आम्ही तुम्हाला सर्वोत्तम देण्याचा विचार करतो. काही चांगले अनुभव तुम्हाला या सिनेमात मिळतील. आता यानंतर या सिनेमाची उत्सुकता आणखी वाढली आहे. 6 डिसेंबर 2024 रोजी “पुष्पा 2: द रुल”भव्य स्वरूपात जगभरात प्रदर्शित होणार आहे.
रिपोर्ट्सनुसार, ‘पुष्पा 2: द रुल’ आणि विकी कौशल, रश्मिका मंदान्ना यांची भूमिका असणाऱ्या ‘छावा’ चित्रपटाबरोबर 6 डिसेंबरला स्पर्धा होऊ शकते. छत्रपती संभाजी महाराज यांच्या जीवनावर आधारित ‘छावा’ चित्रपटाचे दिग्दर्शन लक्ष्मण उत्तेकर यांनी केले आहे, मात्र आता ‘छावा’ चित्रपटाच्या प्रदर्शनाची तारीख पुढे ढकलली जाण्याची शक्यता आहे.
