मुंबईतील वीरा देसाई परिसरातील बॉलीवूड अभिनेता अनुपम खेर यांच्या ऑफिसमध्ये चोरी झाली आहे. चोरट्यांनी कार्यालयाचा दरवाजा तोडून आतून तिजोरी व एक बॉक्स चोरून नेला. चोरीची घटना सीसीटीव्हीत कैद झाली आहे. पोलिसांनी एफआयआर नोंदवला असून लवकरच चोरट्यांना पकडण्याचे आश्वासन दिले आहे. अभिनेते खेर यांनी सोशल मीडियावर ही माहिती दिली आहे.
मिळालेल्या माहितीनुसार, चोरट्यांनी अनुपम खेर यांच्या कार्यालयातून तिजोरी आणि बॉक्स चोरून नेला आहे अनुपम खेर यांनी सोशल मीडियावर व्हिडिओ शेअर केला असून दोन चोरट्यांनी दरवाजा तोडून आत प्रवेश केल्याची माहिती दिली आहे. ते म्हणतात की, “काल रात्री आमच्या वीरा देसाई परिसरातील कार्यालयात चोरी झाली. दोन चोरांनी माझ्या ऑफिसमध्ये बाहेरचा दरवाजा तोडून प्रवेश केला होता. आतमध्ये आल्यावर त्यांनी अकाउंट्स विभागातून आमची तिजोरी ( कदाचित हे चोर ती तिजोरी तोडू शकले नाहीत ) आणि एक बॉक्स चोरून नेला आहे. या बॉक्समध्ये आमच्या कंपनीने निर्मिती केलेल्या एका चित्रपटासंदर्भात काही गोष्टी होत्या. आमच्या कार्यालयाकडून या प्रकरणी एफआयआर दाखल करण्यात आला आहे. तसेच लवकरात लवकरच या चोरट्यांना पकडलं जाईल असं आश्वासन पोलिसांनी आम्हाला दिले आहे. कारण, सीसीटीव्ही कॅमेऱ्यामध्ये हे दोन्ही चोर एका रिक्षात सामान ठेवत असल्याचं दृष्टीस पडत आहे. देव त्यांना सद्बुद्धी देवो…हा व्हिडीओ आमच्या कार्यालयातील कर्मचाऱ्यांनी पोलीस घटनास्थळी दाखल होण्यापूर्वी काढला होता.”
अभिनेते अनुपम खेर हे नेहमीच सोशल मीडियावर सक्रिय असतात आणि त्यांच्या वैयक्तिक आणि व्यावसायिक आयुष्याशी संबंधित फोटो आणि व्हिडिओ चाहत्यांसह शेअर करत असतात.
