Nirmala Sitharaman Saree : अर्थमंत्री निर्मला सीतारामन 2024-25 या आर्थिक वर्षाचा अर्थसंकल्प सादर करत आहेत. हा अर्थसंकल्प मोदी सरकारच्या तिसऱ्या कार्यकाळातील पहिला अर्थसंकल्प आहे. निर्मला सीतारामन 2019 पासून अर्थसंकल्प सादर करत आहेत आणि प्रत्येक वेळी त्यांचा लूक खास असतो. आज त्या सातव्यांदा अर्थसंकल्प सादर करणार आहेत. दरवर्षी या खास दिवसासाठी अर्थमंत्री निर्मला सीतारामन यांच्या साडीची विशेष चर्चा होते. आजही असेच काहीसे पाहायला मिळाले.
आज निर्मला सीतारामन सलग सातव्यांदा अर्थसंकल्प सादर करत आहेत. सकाळी ११ वाजता त्यांनी लोकसभेत अर्थसंकल्प सादर करण्यास सुरुवात केली आहे. यावेळीही देखील अर्थमंत्र्यांचा लूक खूपच खास दिसत आहे. यावेळी त्यांनी क्रीम कलरची साडी घातली आहे. साडीच्या पदराची किनार गुलाबी रंगाची आहे तसेच, गोल्डन कलरची बॉर्डर आहे. नेहमीप्रमाणे यावेळी देखील त्यांच्या लूकची चर्चा होत आहे.
2019 मध्ये अर्थमंत्री निर्मला सीतारामन यांनी त्यांचे पहिले अर्थसंकल्पीय भाषण सादर केले. तेव्हापासून आजतागायत त्यांनी वेगवेगळे लूक धारण केले आहेत. पहिल्या अर्थसंकल्पीय भाषणात त्यांनी गुलाबी रंगाची सिल्क साडी नेसली होती. तर 2020 मध्ये त्यांच्या साडीचा रंग पिवळा होता. त्यावेळी देखील त्यांच्या लूकचे खूप कौतुकही झाले.
कोरोनाच्या काळात, 2021 मध्ये सादर झालेल्या अर्थसंकल्पात त्यांनी लाल बॉर्डर असलेली ऑफ-व्हाइट रंगाची साडी नेसली होती. तर 2022 मध्ये त्यांनी कॉफी रंगाची साडी नेसली होती. रिपोर्ट्सनुसार, ती बोमकाई साडी होती, जी ओडिशामध्ये तयार केली जाते. अर्थमंत्री सीतारामन यांनी 2023 चा अर्थसंकल्प सादर करण्यासाठी पारंपारिक लाल रंगाची साडी नेसली होती. लाल रंग शक्ती, शौर्य आणि प्रेमाचे प्रतीक मानले जाते. त्याच वेळी, 2024 च्या अंतरिम बजेटमध्ये त्यांनी निळ्या रंगाची टसर सिल्क हॅन्डलूम साडी नेसली होती.