बॅचलर ऑफ आयुर्वेदिक मेडिसिन पदवी विद्यार्थ्यांना मोठा दिलासा मिळणार आहे. महाराष्ट्राचे निवासी असलेल्या पण अन्य राज्यातून बीएएमएस केलेल्या विद्यार्थ्यांना पदव्युत्तर आयुर्वेदिक शिक्षणासाठी राज्याच्या कोट्यातून प्रवेश मिळत नव्हता. मात्र आता अशा विद्यार्थ्यांना पदव्युत्तर अभ्यासक्रम कोट्यातून संधी मिळणार आहे. महाराष्ट्राचे मुख्यमंत्री एकनाथ शिंदे यांनी नुकतीच याबाबत घोषणा केली.
काल शनिवारी ३ ऑगस्ट रोजी वर्षा बंगल्यावर झालेल्या एका बैठकीत वैद्यकीय शिक्षण प्रधान सचिव दिनेश वाघमारे यांना आयुर्वेद विद्यार्थ्यांवरील हा अन्याय दूर करण्यासाठी पदव्युत्तर प्रवेश नियमांत आवश्यक ते बदल करून मान्यतेसाठी लगेच सादर करण्याचे निर्देश दिले. या बैठकीला मुख्यमंत्री एकनाथ शिंदे यांच्यासोबत महाराष्ट्र नवनिर्माण सेनेचे प्रमुख राज ठाकरे आणि राष्ट्रवादी काँग्रेस पक्ष अध्यक्ष शरद पवार उपस्थित होते.
राज्याच्या ८५ टक्के कोटा शासकीय व खाजगी अनुदानित तसेच ७० टक्के कोटा खाजगी विना अनुदानित या कोट्यातून प्रवेश घेण्यासाठी अन्य राज्यातून बीएएमएस केलेल्या महाराष्ट्रातील विद्यार्थ्यांना आता संधी मिळणार असल्याने त्यांना मोठा दिलासा मिळणार आहे.
