भाजपचे राष्ट्रीय उपाध्यक्ष बैजयंत जय पांडा आणि काँग्रेस नेते शशी थरूर यांचा एक सेल्फी सोशल मीडियावर व्हायरल झाला आहे, ज्यामुळे राजकीय वर्तुळात चर्चांना उधाण आले आहे. पांडा यांनी सोशल मिडियावर हा सेल्फी शेअर केला आहे. आणि त्याला मिश्कील असे कॅप्शन दिले आहे. “शेवटी एकाचं दिशेने प्रवास करत आहेत” मात्र आता त्यांच्या या पोस्टमुळे शशी थरूर हे काँग्रेस सोडून भाजपाच्या वाटेवर आहेत का? असा सवाल उपस्थित केला जात आहे.
बैजयंत जय पांडा यांनी हा फोटो त्यांच्या ‘एक्स’वर शेअर केला आहे. ज्यामध्ये ते काँग्रेस नेते शशी थरूर यांच्यासोबत सेल्फी काढताना दिसत आहेत. दोन्ही नेते विमानात एकत्र प्रवास करत आहेत. या पोस्टमध्ये पांडा यांनी लिहिले आहे की, “माझ्या मित्राने आणि सहप्रवाशाने मला खोडकर म्हटले कारण त्याने म्हटले की आपण अखेर एकाच दिशेने प्रवास करत आहोत.” शशी थरूर यांनी या पोस्टला उत्तर देत म्हटले आहे की ते फक्त भुवनेश्वरपर्यंतचं सहप्रवासी होते.
भाजपा आणि काँग्रेस नेत्यांच्या एकत्र फोटोमुळे अनेकांच्या भुवया उंचावल्या. अलिकडेच पंतप्रधान नरेंद्र मोदी यांच्या राजनैतिक धोरणांची शशी थरूर यांनी प्रशंसा केली. तसेच थरूर यांनी केंद्रीय मंत्री पीयूष गोयल यांच्यासोबत फोटो पोस्ट करत युकेसोबत दीर्घकाळ रखडलेल्या मुक्त व्यापार कराराचे (FTA) पुनरुज्जीवन केल्याबद्दल सरकारचे कौतुक केले. तसेच त्यांनी पंतप्रधान मोदींच्या अमेरिकेचे अध्यक्ष डोनाल्ड ट्रम्प यांच्याशी झालेल्या भेटीचे कौतुक केले आणि अनेक प्रमुख चिंता दूर करण्यात आल्याचे अधोरेखित केले.
शिवाय शशी थरूर यांनी रशिया-युक्रेन युद्धावर पंतप्रधान मोदींच्या तटस्थ भूमिकेचेही कौतुक केले होते. ते म्हणाले होते की, मी फेब्रुवारी २०२२ मध्ये भारताच्या भूमिकेवर टीका केली होती. पण, आज या धोरणाचा अर्थ असा झाला आहे की भारताकडे खरोखरच असा पंतप्रधान आहे जो दोन आठवड्यांच्या अंतराने मॉस्कोमध्ये युक्रेनचे अध्यक्ष आणि राष्ट्रपती दोघांनाही मिठी मारू शकतो आणि दोन्ही ठिकाणी स्वीकारला जाऊ शकतो. दरम्यान, गेल्या महिन्यात राहुल गांधीं आणि खासदार शशी थरूर यांची दिल्लीत बंद दाराआड बैठक झाली होती. यावेळी शशी थरूर यांच्या बदलत्या भूमिकेवर चर्चा झाली असल्याचे बोलले जात आहे.
