पुण्यात सध्या पार्ट्यांचे प्रमाण वाढले आहे. विद्येचे माहेरघर म्हणून ओळखल्या जाणाऱ्या पुण्यात तरुण पिढी पार्ट्यांमध्ये बुडताना दिसत आहे. विद्यार्थ्यांच्या भविष्याचा विचार करता हा चिंतेचा मुद्दा असून, यावर ठोस पाऊले उचलली गेली पाहिजेत म्हणून कॅन्टोन्मेंट विधानसभा मतदार संघाचे आमदार सुनिल कांबळे यांनी विधानसभेत हा मुद्दा उपस्थित केला होता.
पुणे शहरात अनेक ठिकाणी हुक्का पार्लरच्या नावाखाली अमली पदार्थांचे सेवन केले जात आहे. पुण्यात अनेक ठिकाणी असे प्रकार सुरु असून, अशा हुक्का पार्लरला कोरेगाव पार्क तसेच परिसरात परवानगी दिली आहे का ? असा प्रश्न सुनिल कांबळे यांनी विधानसभेत उपस्थित केला होता. ज्यावर राज्याचे मुख्यमंत्री देवेंद्र फडणवीस यांनी कठोर भूमिका घेत हॉटेल परवाने रद्द करण्याचे आदेश दिले आहे.
देवेंद्र फडणवीस फडणवीस म्हणाले की, ‘वाढते हुक्का पार्लर रोखण्यासाठी २०१८ मध्ये कायदा करण्यात आला होता. आता त्या कायद्यात कडक अंमलबजावणी लवकरच करण्यात येणार आहे. पहिल्यांदा कारवाईत हुक्का सापडल्यास ३ वर्षे शिक्षा होती. मात्र, आता या कायद्यात सुधारणा केली जाणार असून दुसऱ्यांदा हुक्का सापडल्यास ६ महिने हॉटेल अथवा रेस्टॉरंट परवाना रद्द करणे आणि तिसऱ्यांदा हुक्का सापडल्यास कायमचा परवाना रद्द करणे आणि संबंधितावर अजामीनपात्र गुन्हा दाखल केला जाणार आहे. असं फडणवीसांनी स्पष्ट केलं आहे.
