स्टँडअप कॉमेडियन कुणाल कामराच्या अडचणी दिवसेंदिवस वाढत चालल्या आहेत. आधी मुंबई पोलिसांकडून समन्स आता दहशतवादी संघटनांकडून फंडिंग घेतल्याचा आरोप. शिवसेना नेते राहुल कनाल यांनी कुणाल कामरावर गंभीर आरोप करत कामराच्या यूट्यूब चॅनलला दहशतवादी संघटनांकडून फंडिंग केलं जात असल्याचं म्हंटल आहे.
सोमवारी कुणाल कामराने आपल्या युट्यूब चॅनेलवर एक व्हिडिओ पोस्ट केला होता. या व्हिडिओमध्ये त्याने देशातील सध्याच्या राजकीय स्थितीवर भाष्य केलं आहे. यावेळी त्याने महाराष्ट्राचे उपमुख्यमंत्री एकनाथ शिंदे यांच्यावर एक वादग्रस्त गाणं देखील म्हंटल. ज्यानंतर महाराष्ट्रातील राजकीय वातावरण चांगलंच तापलं. कुणाल कामराचा व्हिडीओ ज्या स्टुडिओमध्ये शूट झाला होता, त्या स्टुडिओची शिंदे गटाच्या कार्यकर्त्यांनी तोडफोड केली. शिवाय कुणाल कामराने शिंदेंचा अपमान केल्याबद्दल माफी मागावी अशी मागणी केली. त्याचवेळी कुणाल कामरा विरुद्ध उपमुख्यमंत्र्यांचा अपमान केल्याप्रकरणी गुन्हा देखील दाखल करण्यात आला आहे.
तक्रार दाखल झाल्यानंतर मुंबई पोलिसांनी कुणाल कामराला चौकशीसाठी समन्स बजावले आहे. पण तो चौकशीसाठी हजर झाला नाही. पोलिसांच्या समन्सला उत्तर देत कुणाल कामराने पोलिसांसमोर हजर होण्यासाठी एका आठवड्याचा वेळ मागितला आहे.
दरम्यान, कुणाल कामरावर सध्या महायुतीच्या नेत्यांकडून जोरदार टीका होत आहे तसेच सर्वजण कारवाईची मागणी करत आहेत. शिंदेसेनेकडून कुणाल कामराविरोधात दोन तक्ररी दाखल करण्यात आल्या आहेत. आता पोलिस त्याच्याविरोधात पुढे काय कारवाई करतात हे पाहणं महत्वाचं ठरणार आहे.
