महाराष्ट्राचे उपमुख्यमंत्री देवेंद्र फडणवीस (Devendra Fadnavis) यांनी पुण्याच्या लोहगाव विमानतळाचे नाव बदलून जगद्गुरु संत तुकाराम महाराज आंतरराष्ट्रीय विमानतळ, पुणे (Jagadguru Sant Tukaram Maharaj International Airport Pune) असे नामकरण करण्यात येणार आहे अशी घोषणा केली होती. आज मंत्रिमंडळ बैठक (Cabinet meeting)होणार असून या बैठकीत विमानतळाच्या नामांतराबाबतचा निर्णय घेण्यात येईल असे सांगण्यात आले आहे.
दरम्यान, केंद्रीय नागरी हवाई वाहतूक राज्यमंत्री मुरलीधर मोहोळ (Murlidhar Mohol) यांनी लोहगाव येथील पुणे आंतरराष्ट्रीय विमानतळाला जगद्गुरू संतश्रेष्ठ तुकाराम महाराज यांचे नाव देण्यात यावे असा प्रस्ताव राज्य सरकारने तयार करून केंद्र सरकारकडे पाठवावा,’ अशी मागणी काही दिवसांपूर्वी राज्य सरकारकडे केली होती.
उपमुख्यमंत्री देवेंद्र फडणवीस यांनी दोन दिवसांपूर्वी पुण्यात झालेल्या पुणे पालखी मार्ग भूमिपूजन सोहळ्यात बोलताना लोहगाव येथील पुणे आंतरराष्ट्रीय विमानतळाला जगद्गुरू संतश्रेष्ठ तुकाराम महाराज यांचे नाव देण्यात येईल अशी घोषणा केली आहे. केंद्रीय मंत्री नितीन गडकरी यांनीही याला पाठींबा दिला आहे. पुण्याचे खासदार मुरलीधर मोहोळ यांची मागणी पूर्ण करण्यासाठी देवेंद्र फडणवीस यांनी ही घोषणा केलेली आहे. राज्याच्या कॅबिनेटमध्ये मंजुरी घेऊन प्रस्ताव केंद्राकडे पाठवणार आहोत, असे भाष्य देखील यावेळी बोलताना देवेंद्र फडणवीस यांनी केले आहे.
केंद्रीय रस्ते वाहतूक मंत्री नितीन गडकरी (Nitin Gadkari) यांनी सुद्धा या मागणीला पाठींबा दर्शविला आहे. पुण्यामध्ये राष्ट्रीय महामार्गांच्या भूमिपूजन सोहळ्यात बोलताना नितीन गडकरी म्हणाले आहेत की, आम्ही केंद्रात पंतप्रधांनाकडून हा प्रस्ताव मंजूर करून घेतल्याशिवाय राहणार नाही.
दरम्यान, आता आज मंत्रिमंडळ बैठक होणार असून या बैठकीत काय निर्णय घेतला जाणार याकडेच सर्वांचे लक्ष लागून आहे.