राज्याचे उपमुख्यमंत्री अजित पवार यांच्या गुलाबी रंगाच्या जॅकेटची हवा आता मराठी बिग बॉसच्या घरात देखील दिसून येत आहे, नुकताच भाऊचा धक्का हा भाग प्रदर्शित करण्यात आला. रविवारी दाखवण्यात आलेल्या या भागात ‘बिग बॉस स्पर्धक धनंजय पोवार गुलाबी रंगाच्या जॅकेटमध्ये दिसून आला. धनंजय पोवार याने घातलेल्या गुलाबी रंगाच्या जॅकेटवर ‘शो’चा होस्ट रितेश देशमुख याने भन्नाट कमेंट केली, जी सध्या सर्वत्र व्हायरल होत आहे.
रविवारी दाखवण्यात आलेल्या ‘भाऊचा धक्का’ या एपिसोडमध्ये रितेशने काही स्पर्धकांची शाळा घेतली तर काहींचं कौतुक केलं. मात्र, त्याने केलेल्या एका कमेंटने अख्या महाराष्ट्राचे लक्ष वेधून घेतले. धनंजयने घातलेल्या गुलाबी जॅकेटवर रितेशने कमेंट केली “धनंजय तुमचं जॅकेट फार छान आहे. टेलर बहुतेक बारामतीचा दिसतोय. कारण ही तिकडची स्टाइल आहे. कोल्हापूरपर्यंत आली आहे, असं कळतंय. छान दिसतंय” हे ऐकताच धनंजयसह घरातील इतर स्पर्धक हसू लागतात.
खरं तर सध्या अजित पवार हे ‘लाडकी बहीण योजने’ची घोषणा केल्यापासून गुलाबी रंगाच्या जॅकेटयामध्ये दिसत आहेत. त्यांच्या या जॅकेटची गेल्या काही दिवसांपासून चर्चा होत आहे, राजकारणी देखील दादांच्या या स्टाईलवर कमेंट करत आहेत, अशातच रितेश देशमुखने केलेल्या या कमेंटनंतर गुलाबी रंगाच्या जॅकेटची हवा ‘बिग बॉसच्या घरात देखील दिसून आली.
