Raj Thackeray : पाकिस्तानी अभिनेता फवाद खानचा ‘लिजेंड ऑफ मौला जट’ हा चित्रपट लवकरच भारतात प्रदर्शित होणार आहे. दरम्यान, हा चित्रपट कोणत्याही परिस्थितीत महाराष्ट्रात प्रदर्शित होऊ देणार नाही, असा इशारा महाराष्ट्र नवनिर्माण सेनेचे अध्यक्ष राज ठाकरे यांनी दिला आहे. पाकिस्तानी कलाकारांचे चित्रपट भारतात का प्रदर्शित होऊ दिले जातात? असा सवाल उपस्थित करत त्यांनी चित्रपट भारतात प्रदर्शित होऊ देणार नसल्याचा इशारा दिला आहे.
राज ठाकरे यांनी त्यांच्या X सोशल मीडिया हँडलवर ट्विट करत याबद्दल लिहिले, ‘कलेला राष्ट्रीय सीमा नसतात, जे इतर बाबतीत ठीक आहे, परंतु हे पाकिस्तानसाठी अजिबात चालणार नाही. भारतद्वेषाच्या मुद्द्यावरून विभागलेल्या देशातील कलाकारांना नाचण्यासाठी, गाण्यासाठी आणि त्यांचे चित्रपट दाखवण्यासाठी कोणत्या प्रकारची कारवाई केली जात आहे? सरकारने हा चित्रपट महाराष्ट्रात काय तर देशातील कोणत्याही राज्यात प्रदर्शित होऊ देऊ नये.
राज ठाकरेंचा चित्रपटगृहांच्या मालकांना इशारा
त्यांनी सवाल करत “बाकी राज्यांनी काय करायचे? सध्या तरी हा चित्रपट महाराष्ट्रात प्रदर्शित होऊ देणार नाही, हे निश्चित आहे. याआधीही अशा घटना घडल्या होत्या, तेव्हा महाराष्ट्राने दिलेला धक्का सगळ्यांनाच आठवतोय. त्यामुळे आता थिएटर मालकांना नम्र विनंती आहे की, चित्रपट प्रदर्शित करण्याच्या भानगडीत पडू नका.”
राज ठाकरे म्हणाले, “हा चित्रपट प्रदर्शित होण्याच्या सुमारास नवरात्रोत्सव सुरू होईल. मला महाराष्ट्रात कोणताही संघर्ष नको आहे आणि ही राज्याचे मुख्यमंत्री, गृहमंत्री आणि पोलिस महासंचालकांची इच्छा नाही आणि आम्हाला देखील संघर्ष नको आहे, म्हणून आपल्याला वेळेआधीच पावले उचलून हा चित्रपट आपल्या देशात प्रदर्शित होणार नाही हे पाहावे लागेल.
ते म्हणाले, “मराठी चित्रपटांसाठी थिएटर्स देण्यास टाळाटाळ करणाऱ्या थिएटर मालकांनी पाकिस्तानी चित्रपटांना आपल्या मातीत येऊ दिले, तर हे महागात पडेल, हे विसरता कामा नये. मला पाकिस्तानी सिनेमांसाठी राज्यात कोणताही संघर्ष नको आहे आणि मला खात्री आहे की सरकार याकडे योग्य लक्ष देईल.
फवाद खानचा ‘लिजेंड ऑफ मौला जट’ पाकिस्तान आणि इतर देशांमध्ये रिलीज झाला आहे आणि पाकिस्तानचा सर्वाधिक कमाई करणारा चित्रपट ठरला आहे. आता भारतात, झी स्टुडिओने त्याचे कॉपी हक्क विकत घेतले आहेत, जे भारतात 2 ऑक्टोबर रोजी रिलीज करत आहेत.
