विधानसभा निवडणूक तोंडावर आली असताना राज्यात अनेक घडामोडींना वेग आला आहे. मुंबईमध्ये (Mumbai )राष्ट्रवादी काँग्रेस अजित पवार (NCP) यांच्या पक्षाच्या तालुकाध्यक्षावर हल्ला झाल्याचा धक्कादायक प्रकार घडला आहे. तालुकाध्यक्ष सचिन कुर्मी (sachin kurmi) यांच्यावर जोरदार हल्ला करण्यात आला. अज्ञाताने केलेल्या या हल्ल्यात त्यांना आपला जीव गमवावा लागला आहे. शुक्रवारी रात्री 12 वाजण्याच्या सुमारास भायखळा परिसरातील म्हाडा कॉलनीच्या मागे ही घटना घडली आहे. हल्ल्यानंतर त्यांना जेजे हॉस्पिटल मध्ये उपचारासाठी दाखल करण्यात आले होते परंतु त्यांचा या हल्ल्यात मृत्यू झाला आहे. या घटनेने परिसरात खळबळ उडाली आहे.

या घटनेची माहिती पोलिसांना मिळताच ते घटनास्थळी दाखल झाले. पोलिसांच्या गाडीतून उपचारांसाठी सचिन कुर्मी यांना नेले होते परंतु डॉक्टरांनी त्यांना मृत घोषित केले. या हत्येमुळे त्यांचे समर्थक आक्रमक झाले असून आरोपींना लवकरात लवकर पकडावे अशी मागणी केली जात आहे. याचसोबत सचिन कुर्मी यांच्यावर कोणी आणि का हल्ला केला हे अजून समोर आलेले नाही. कोणत्यातरी वादातून ही हत्या झाल्याची प्राथमिक माहिती पोलिसांनी दिलेली आहे.

राष्ट्रवादी काँग्रेस पक्षाचे मुंबईचे अध्यक्ष समीर भुजबळ (Sameer Bhujbal) यांचे सचिन कुर्मी हे जवळचे कार्यकर्ते होते. यामुळेच आता समीर भुजबळ कुर्मी कुंटूबांची आज भेट घेणार आहेत. दरम्यान, या प्रकरणाचा सखोल तपास पोलीस करत आहेत.या घटनेने परिसरात भीतीचे वातावरण निर्माण झाले आहे. याप्रकरणी अद्याप कोणालाच अटक झाली नाही. यामुळे या घटनेत पोलीस पुढील कारवाई काय करणार ? याकडेच सर्वांचे लक्ष लागलेले आहे.