Veena Dev : लेखन, संकलन, संपादन अशा विविध साहित्य प्रकारांमध्ये मुशाफिरी करणाऱ्या ज्येष्ठ लेखिका (Veteran Writer) आणि मराठीच्या प्राध्यापिका डॉ. वीणा विजय देव (वय ७५) (Dr. Veena Vijay Dev) यांचे मंगळवारी निधन झाले आहे. 29 ऑक्टोबर रोजी वीणा देव यांनी अखेरचा श्वास घेतला.

वीणा देव यांच्या जाण्याने साहित्य क्षेत्रावर शोककळा पसरली आहे. वीणा देव यांच्या साहित्याचं साहित्यप्रेमींकडून कायमच कौतुक केले जाते. इतकच नव्हे तर त्यांनी सुमारे 32 वर्षे अध्यापनाचे काम देखील केले आहे.

वीणा देव यांचे साहित्य…

डॉ. वीणा विजय देव या प्रसिद्ध साहित्यिक गो. नी. दांडेकर यांच्या कन्या होत्या. पुण्यातील शाहू मंदिर महाविद्यालयात त्यांनी मराठी विभागप्रमुख काम केले. तिथेच त्यांनी 32 वर्षे अध्यापनाचे कार्य केले. मराठी कथा-कादंबऱ्यांची नाट्यरूपे या विषयावर सादर केलेल्या प्रबंधासाठी त्यांना पीएच.डी. ही पदवी मिळाली. वीणा देव यांनी लेखन, संकलन आणि संपादन असे विविध साहित्यप्रकार लीलया हाताळले. त्यांचे ‘कधीकधी’, ‘परतोनी पाहे’, ‘स्त्रीरंग’, ‘विभ्रम’, ‘स्वान्सीचे दिवस’ हे लेखसंग्रह, ‘स्मरणे गोनिदांची’ हा स्मरणग्रंथ आदी पुस्तके प्रसिद्ध आहेत. गो. नी. दांडेकर यांच्यावर त्यांनी लिहिलेल्या ‘आशक मस्त फकीर’ या व्यक्तिचित्रणात्मक पुस्तकास राज्य सरकारचा उत्कृष्ट ललित साहित्य निर्मितीचा पुरस्कार मिळाला होता. मोरया गोसावी जीवनगौरव पुरस्कार तसेच साईरंग प्रतिष्ठानतर्फे कर्तृत्वगौरव पुरस्काराने त्यांना सन्मानित करण्यात आले होते.

वीणा देव यांच्या जाण्याने अभिनेत्री मृणाल कुलकर्णी यांच्यावर दुःखाचा डोंगर कोसळला आहे. वीणा देव या मृणाल कुलकर्णी यांच्या मातोश्री होत्या. वीणा देव यांच्या पश्चात कन्या मृणाल आणि मधुरा, जावई, नातू, नातसून असा परिवार आहे.