सरपंच संतोष देशमुख हत्या प्रकरणी योग्य तो न्याय मिळावा, या मागणीसाठी मुंबईत जनआक्रोश मोर्चा काढण्यात आला. मुंबई मेट्रो सिनेमा ते आझाद मैदान दरम्यानच्या या मोर्चात मराठा क्रांती मोर्चा सदस्यांसह संतोष देशमुख यांचे कुटुंबीय सहभागी झाले होते. आज पहिल्यांदाच संतोष देशमुख यांच्या भगिनी प्रियांका चौधरी यांनीही या मोर्चात सहभाग नोंदवला.
माध्यमांशी बोलताना संतोष देशमुखांना लवकरात लवकर न्याय देण्याची मागणी सरकारकडे केली आहे.
संतोष देशमुख यांच्या बहिण प्रियांका चौधरी म्हणाल्या, योग्य रितीने तपास होत असता तर आरोपी पकडला गेला असता. आता दोन महिने झाले तरी एक आरोपी पकडला जात नाहीय. त्यामुळे आता प्रश्न निर्माण व्हायला लागला आहे. मुलांचं काय होणार पुढे? ते पुढे शिकतील की नाही? वैभवीची परीक्षा जवळ आली आहे. नेमकं काय करावं हे माझ्या कुटुंबाला कळत नाहीय. माझी धाकटी वहिनी अॅडमिट आहे. लहान भाऊ सलाईन लावून मोर्चा करतोय. का बरं दखल घेत नाही. या बहिणीची सरकारला कळकळीची विनंती आहे. लवकरात लवकर आरोपीला पकडून फाशीची शिक्षा द्यावी. जर माझ्या लहान भावालाही काहीतरी झालं तर कुटुंब कसं चालणार? माझे आई वडील म्हातारे आहेत. मीही आजारी असते. माझं रक्त कमी आहे, व्हिटॅमिन कमी आहेत.
पाच महिन्यांपूर्वी एकदा भाऊ पुण्याला आला होता. आम्ही हॉटेलमध्ये जेवायला गेलो होतो. माझ्या आजारपणाबद्दल मी त्याला म्हणाले तेव्हा त्याने मला बाहेर रस्त्यावर राहणारे लोकलही कसे आनंदी राहतात हे दाखवलं. तो राजा होता आणि देवमाणूस होता. तो आनंदी कसं राहायचं हे शिकवत होता. त्याच्या एका वाक्यानेच मी झोपेतून उठायचे. त्यामुळे त्याच्या मुलांकडे पाहून तरी सरकारने आरोपीला पकडावं. त्या मुलांचं खूप वाईट वाटतंय, अशी भावनिक प्रतिक्रियाही त्यांनी दिली. यावेळी त्यांना अश्रू अनावर झाले.
