पंतप्रधान नरेंद्र मोदी यांनी शुक्रवारी एका समिटमध्ये भारताच्या विकास आणि भविष्याच्या दृष्टीवर आपले विचार मांडले. त्यांनी भारताच्या सध्याच्या स्थितीवर आणि जागतिक पातळीवर त्याच्या वाढत्या भूमिकेवर सविस्तर भाष्य केले. मोदींच्या मते, भारत आज संपूर्ण जगाचं लक्ष आकर्षित करत आहे, ते म्हणाले, “गेल्या दशकात भारताने आपली जीडीपी दुप्पट केली, २५ कोटी लोक गरिबीतून बाहेर आले आणि नव्या मध्यमवर्गाचा भाग बनले.” यादरम्यान मोदी यांनी असा ठाम विश्वास व्यक्त केला की, २०४७ पर्यंत भारत नक्कीच विकसित राष्ट्र बनेल”
तर, पश्चिम बंगालच्या मुख्यमंत्री ममता बॅनर्जी यांनी युकेमधील आपल्या अधिकृत दौऱ्यादरम्यान भारताच्या भविष्यावर एक वेगळे मत मांडले आहे. भारताने यूकेला मागे टाकून जगातील पाचव्या क्रमांकाची सर्वांत मोठी अर्थव्यवस्था ठरण्याचा मान मिळवला असून भारत लवकरच तिसऱ्या स्थानी, तर २०६०पर्यंत अव्वल स्थानी झेप घेईल, असा अंदाज असल्याचा उल्लेख मुलाखतकाराने केला. त्यावर याबाबत आपले मत वेगळे असल्याचे ममता बॅनर्जी यांनी स्पष्ट केले. ‘अशा अनेक गोष्टी आहेत, ज्याबाबत मला बोलता येणार नाही. अंतर्गत बाबी आणि परराष्ट्र व्यवहार महत्त्वाचे आहेत. कोविडनंतर सर्वच देशांपुढे समस्या आहेत. जगभरात आर्थिक युद्धसदृश स्थिती असताना, आम्हाला लाभ होईल असे कसे म्हणता येईल? याबाबत केवळ आशा करता येईल. माझा देश सर्वोत्तम असावा, हे आमचे स्वप्न आहे. पण बऱ्याच गोष्टींवर हे अवलंबून असेल,’अशी भूमिका बॅनर्जी यांनी मांडली..
ममता बॅनर्जी यांच्या विधानांचा भाजपने जोरदार विरोध केला आहे.‘ममता बॅनर्जी परदेशात भारताच्या प्रतिमेला धक्का लावत आहेत. त्यांची भारतविरोधी भूमिका सर्व भारतीयांसाठी लज्जास्पद आहे, त्या भूषवत असलेल्या घटनात्मक पदाचाही हा अपमान आहे,’ या शब्दांत भाजपचे प्रदेशाध्यक्ष सुकांत मजुमदार यांनी ‘एक्स’वरून ममतांवर शरसंधान साधले.
दरम्यान ऑक्सफर्ड विद्यापीठातील कार्यक्रमात, ममता बॅनर्जी या भाषण करत असताना अनिवासी भारतीयांच्या एका गटाने निवडणुकीतील हिंसाचार आणि कोलकात्यातील बलात्कार प्रकरणावरून निदर्शने केली. त्यावेळी, स्टुडंट फेडरेशन ऑफ इंडिया, यूके यांनी सोशल मीडिया प्लॅटफॉर्मवरून व्हिडीओ प्रसारित केला, ज्यामध्ये निदर्शक ममता बॅनर्जी यांच्या भाषणात वारंवार व्यत्यय आणताना दिसत आहेत.
