ऐन ईदच्या तोंडावर बीडच्या गेवराई तालुक्यातील अर्धामसला गावात एका मशिदीमध्ये स्फोट करण्यात आल्याची धक्कादायक माहिती समोर आली होती.या स्फोटाच्या प्रकरणात बीड पोलिसांनी दोन आरोपींना अटक केली असून त्यांची चौकशी सुरु आहे. घटनेच्या तपासासाठी अँटी टेररिस्ट स्क्वॉड (एटीएस) घटनास्थळी दाखल झाली आणि आरोपींशी त्याच दिवशी उशिरापर्यंत चौकशी करण्यात आली. एटीएस या स्फोटाचा दहशतवादी कृत्याशी काही संबंध आहे की हा केवेळ खोडसाळपणा आहे याचा तपास करत आहे,

अधिकृतपणे, या प्रकरणाचा तपास स्थानिक गुन्हे शाखेकडे (LCB) देण्यात आला असून, ती या प्रकरणाचा सखोल तपास करीत आहे. तसेच पोलिसही आरोपींच्या पार्श्वभूमीचा सखोल अभ्यास करत असून त्यांच्या सोशल मीडियावर देखील लक्ष ठेवत आहेत. स्फोटाच्या कटात किती लोकांचा समावेश होता आणि त्यामागील उद्देश काय होता, हे शोधण्याचा प्रयत्न सुरू आहे. पोलिसांनी स्पष्ट केले आहे की, प्रकरणाच्या मुळाशी जाण्यासाठी तपास विविध अंगांनी सुरू आहे.

रविवारी झालेल्या या स्फोटामुळे बीड परिसरात तणाव निर्माण झाला आहे. घटनेनंतर तातडीने पोलिस प्रशासनाने अतिरिक्त सुरक्षा व्यवस्था तैनात केली आहे, आणि आरोपींवर कठोर कारवाई केली जाईल, असे आश्वासन दिले आहे. बीड पोलिस अधीक्षक नवनीत कावर यांनी आयएएनएसला सांगितले की, स्फोट रविवारी पहाटे सुमारे २:४५ वाजता घडला. घटनेची माहिती मिळताच २० मिनिटांत पोलिस घटनास्थळी पोहोचले आणि पहाटे ५:३० वाजेपर्यंत परिस्थितीचा आढावा घेतला.

कावर यांनी सांगितले की, “दोन्ही संशयितांना अटक करण्यात आली आहे. त्यांनी मशिदीच्या आत स्फोटक उपकरणांचा वापर करून स्फोट घडवून आणला. प्राथमिक चौकशीत असे आढळले की, आरोपींचा मुस्लिम समाजातील काही मुलांसोबत वाद झाला होता आणि त्याच्या बदल्यात त्यांनी हे कृत्य केले.” कावर यांनी सांगितले की, या प्रकरणी एफआयआर दाखल करण्यात आला असून तपासाची जबाबदारी स्थानिक गुन्हे शाखेला देण्यात आली आहे. तपासाची विशेष देखरेख करण्यासाठी एक पोलिस निरीक्षक नेमण्यात आला आहे. “हा उच्चस्तरीय तपास पारदर्शक पद्धतीने केला जाईल आणि दोषींवर कठोर कारवाई केली जाईल,” असेही त्यांनी स्पष्ट केले.

पोलिसांनी नागरिकांना अफवांपासून दूर राहण्याचे आणि प्रशासनावर विश्वास ठेवण्याचे आवाहन केले आहे. ते म्हणाले, “कायद्याच्या चौकटीत राहून कठोर कारवाई केली जाईल, ज्यामुळे परिसरात शांतता आणि सौहार्द राखले जाईल.”