दिल्ली दारू घोटाळा प्रकरणाने घेरलेले मुख्यमंत्री अरविंद केजरीवाल यांच्या अडचणीत सातत्याने वाढ होत आहे. आता सीबीआयच्या विशेष न्यायालयाने केजरीवाल यांना १४ दिवसांची न्यायालयीन कोठडी सुनावली आहे. सीबीआयची ३ दिवसांची कोठडी संपल्यानंतर केंद्रीय अन्वेषण विभागाने दिल्लीच्या मुख्यमंत्र्यांना १४ दिवसांच्या न्यायालयीन कोठडीची मागणी केली होती. राऊस एव्हेन्यूच्या विशेष सीबीआय न्यायालयाने अरविंद केजरीवाल यांची १२ जुलैपर्यंत न्यायालयीन कोठडीत तिहार तुरुंगात रवानगी केली आहे.

केजरीवाल यांच्या वकिलाने सीबीआयच्या रिमांडच्या मागणीला विरोध केला. त्यांनी दाखल केलेल्या अर्जाच्या आधारे सीबीआयला तपासाशी संबंधित गोळा केलेली सामग्री रेकॉर्डवर ठेवण्याचे निर्देश मागितले. त्यांच्या मागणीवर न्यायाधीश म्हणाले की, हा पैलू न्यायालयावर सोडला पाहिजे. तपासातील महत्त्वाच्या बाबी आरोपींना सांगता येत नाहीत.सीबीआयच्या वकिलाने सांगितले की, आरोपी तपासाचा तपशील किंवा केस डायरी मागू शकत नाही. यावर न्यायाधीशांनी सीबीआयला सांगितले की, मी आयओला केस डायरीची संबंधित पाने चिन्हांकित करण्यास सांगेन.

25 जून रोजी सीबीआयने केजरीवाल यांची तिहार तुरुंगात चौकशी केल्यानंतर त्यांना अटक केली होती आणि न्यायालयाच्या परवानगीनंतर त्यांना तीन दिवसांच्या रिमांडवर घेण्यात आले होते. दिल्लीचे मुख्यमंत्री केजरीवाल यांच्या सुटकेच्या मागणीसाठी आम आदमी पक्षाच्या नेत्यांनी आणि कार्यकर्त्यांनी भाजप मुख्यालयाजवळ निदर्शने केली. केजरीवाल यांना कनिष्ठ न्यायालयातून जामीन मिळाला होता, ज्याला दिल्ली उच्च न्यायालयाने स्थगिती दिली होती. यानंतर आप कार्यकर्ते भाजपवर षडयंत्र असल्याचा आरोप करत आहेत.