पुण्यातील कल्याणीनगर येथील पोर्शे कार अपघातामध्ये दोन जणांचा मृत्यू झाला आहे. दरम्यान पुण्यात पुन्हा एकदा पोर्शे अपघाताची पुनरावृत्ती घडली आहे. त्यामुळे पुण्यात एकच खळबळ उडाली आहे. जुन्या मुंबई-पुणे महामार्गावर बोपोडी येथे अज्ञात वाहनाने दोन पोलिसांना चिरडल्याची घटना घडली आहे. या अपघातामध्ये एका पोलीस कर्मचाऱ्याचा मृत्यू झाला आहे. रविवारी मध्यरात्री हा अपघात घडला आहे.
जुन्या मुंबई-पुणे महामार्गावरील हॅरिस ब्रिजच्या खाली मध्यरात्री हा अपघात घडला आहे. गस्त घालण्यासाठी दुचाकीवरून जात असलेल्या पोलिसांना अज्ञात वाहनाने धडक दिली आहे. त्यात एका पोलिसांचा मृत्यू झाला आहे. अपघात झाल्यानंतर चालक आपल्या वाहनासह फरार झाला आहे. जखमी पोलिसाला उपचारांसाठी रुग्णालयात दाखल करण्यात आले आहे.
काय आहे पुण्यातील पोर्शे अपघात प्रकरण?
पुण्यातील कल्याणीनगर येथील पोर्शे कार अपघाताबद्दल रोज नवनवीन माहिती समोर येत आहे. अल्पवयीन आरोपीने भरधाव वेगाने गाडी चालवत दोन जणांचा जीव घेतला होता. त्यानंतर त्याला झालेली अटक, कोर्टाने सुनावलेली शिक्षा यावरून सोशल मीडियावर बरीच टीका टिपण्णी करण्यात आली होती. ३०० शब्दांचा निबंध लिहावा, नियोजन करावे अशा शिक्षा कोर्टाने त्याला दिल्या होत्या. अखेर बालसुधारगृहातून बाहेर आल्यानंतर त्या अल्पवयीन आरोपीने ३०० शब्दांचा निबंध लिहिला आहे. अल्पवयीन आरोपीने ३०० शब्दांचा निबंध अखेर आपल्या वकिलांमार्फत बालहक्क न्यायालयापुढे सादर केला आहे.
पोर्शे कार अपघाताप्रकरणी अल्पवयीन आरोपीचे आई-वडील अजूनही तुरुंगातच आहेत. ससून हॉस्पिटलमध्ये आरोपीच्या रक्ताच्या नमुन्याची अदलाबदल किंवा त्याच्याशी छेडछाड केल्याप्रकरणी आरोपीच्या आईला अटक करण्यात आली आहे. त्यांची चौकशी अजूनही सुरुच आहे. दरम्यान आरोपीच्या आत्याने पुणे पोलीस व बालहक्क मंडळाच्या विरुद्ध मुंबई हायकोर्टात याचिका दाखल केली होती. त्यानंतर हायकोर्टाने त्यांना पुन्हा केलेली अटक चुकीची होती असे म्हणत आरोपीला तात्काळ तुरुंगातून बाहेर काढण्याचे आदेश दिले होते. त्यानुसार ता आरोपीचा ताबा त्याच्या आत्येकडे देण्यात आला आहे.
