Budget 2024 : मोदी 3.0 चा पहिला पूर्ण अर्थसंकल्प मंगळवारी 23 जुलै रोजी सादर होणार आहे. अर्थमंत्री निर्मला सीतारमण सलग सातव्यांदा बजेट सादर करतील. बजेट सादर करताच निर्मला सीतारमण माजी पंतप्रधान मोरारजी देसाई यांचा रेकोर्ड मोडत एक खास इतिहास रचणार आहेत.

सर्वाधिकवेळी बजेट सादर करण्याचा रेकॉर्ड आत्तापर्यंत माजी पंतप्रधान मोरारजी देसाई यांच्या नावावर आहे. मात्र, उद्याचा अर्थसंकल्प सादर करताच निर्मला सीतारमण त्यांचा हा रेकॉर्ड मोडतील आणि नवा इतिहास रचतील.

यापूर्वी माजी पंतप्रधान मोरारजी देसाई यांनी अर्थमंत्री असताना सलग सहा वेळा अर्थसंकल्प सादर केला होता. त्यांनी १९५९-१९६४ या काळात पाचवेळा वार्षिक आणि एकावेळी अंतरिम बजेट सादर केले होते.

2019 मध्ये निर्मला सीतारामण या भारताच्या पहिल्या पूर्णवेळ महिला अर्थमंत्री बनल्या. त्यानंतर पंतप्रधान नरेंद्र मोदी यांनी सलग दुसऱ्यांदा केंद्रात सरकार स्थापन केले. तेव्हापासून, सीतारामन यांनी सलग सहा अर्थसंकल्प सादर केले आहेत, ज्यात या वर्षी फेब्रुवारीमध्ये सादर करण्यात आलेला अंतरिम अर्थसंकल्पदेखील आहे. 2024-25 या आर्थिक वर्षासाठी सादर करण्यात आलेला पूर्ण अर्थसंकल्प हा त्यांचा सलग सातवा अर्थसंकल्प असेल.

सरकार अर्थसंकल्पात कोणत्या गोष्टीवर लक्ष देऊ शकते?

यावेळी लोकसभा निवडणुकीत भाजपला पूर्ण बहुमत मिळाले नाही आणि एनडीए आघाडीचे सरकार स्थापन झाले. अशा स्थितीत सामान्य जनता, करदाते आणि नोकरदार लोकांसाठी सरकारने पूर्ण अर्थसंकल्पात मोठ्या घोषणा करणे अपेक्षित आहे. यावेळी सरकार मुख्यत्वे मध्यमवर्गावर लक्ष केंद्रित करू शकते. यासाठी आयकरात सवलत जाहीर करणे शक्य आहे.

मिळालेल्या माहितीनुसार अर्थमंत्री निर्मला सीतारामन येत्या जुलैमध्ये कर नियमांमध्ये बदल करू शकतात. आतापर्यंत, 3 लाख रुपये कमावणाऱ्यांना कोणताही कर भरावा लागत नाही आणि ही सूट मर्यादा 5 लाख रुपयांपर्यंत वाढवली जाऊ शकते.