Pooja Khedkar : गेल्या काही दिवसांपासून पूजा खेडकर हे प्रकरण चांगलेच चर्चेत आहे. आज या प्रकरणावर दिल्लीच्या पटियाला हाऊस न्यायालयामध्ये सुनावणी झाली. यावेळी पुजा खेडकर यांचे वकील ॲड. माधवन यांनी पुण्याचे जिल्हाधिकारी सुहास दिवसे यांच्यावर गंभीर आरोप केला आहे. ‘सुहास दिवसें यांनी पूजा खेडकर यांचा लैंगिक छळ करण्याचा प्रयत्न केला, असे ॲड. माधवन म्हणाले आहेत.
पूजा खेडकर यांच्यावर अनेक गंभीर आरोप झाले आहेत. यूपीएससीची फसवणूक करुन पूजा खेडकर अधिकारी झाल्याचे सांगितले जात आहे. यावरुन त्यांच्यावर अटकेची टांगती तलवार असताना पूजा काही दिवसांपासून फरार आहेत. या दरम्यान पूजा खेडकर यांनी पुण्याचे जिल्हाधिकारी सुहास दिवसे यांच्यावर गंभीर आरोप केले होते.
पूजा खेडकर यांच्या अटकपूर्व जामिनाच्या याचिकेवर दिल्लीच्या पटियाला हाऊस न्यायालयामध्ये सुनावणी सुरु असताना पूजा खेडकर यांचे वकील ॲड. माधवन यांनी सुहास दिवसे यांच्यावर गंभीर आरोप केला, ‘सुहास दिवसे यांनी पूजा यांना त्यांच्या खोलीत यायला सांगितले होते. मात्र, पूजाने त्याला नकार दिला’, असे ॲड. माधवन म्हणाले आहेत.
दरम्यान, गेल्या काही दिवसांपासून गायब असलेल्या पूजा यांनी अटकपूर्व जामिनाची मागणी केली आहे. ‘माझ्यावर गुन्हेगारी खटला दाखल केल्याने आणि मला कोणत्याही क्षणी अटक होण्याची शक्यता असल्याने मी माझा बचाव करण्यास असमर्थ आहे. त्यासाठी मला अटकपूर्व जामिनाची गरज आहे. मला अटक करण्यास स्थगिती दिल्यास मला बचावाची संधी मिळेल’, असे पूजा खेडकरने वकिलांमार्फत न्यायालयात सांगितले आहे.
