दिल्लीच्या पटियाला हाऊस कोर्टाचे अतिरिक्त सत्र न्यायाधीश देवेंद्र कुमार जंगला यांनी महाराष्ट्रातील वादग्रस्त प्रशिक्षणार्थी IAS अधिकारी पूजा खेडकरचा अटकपूर्व जामीन अर्ज फेटाळला आहे. न्यायालयाने 31 जुलै रोजी याबद्दल निर्णय राखून ठेवला होता. अटकपूर्व जामीन याचिकेवरील सुनावणीदरम्यान, पूजा खेडकरची बाजू मांडणाऱ्या वकील बीना माधवन यांनी सांगितले की, या प्रकरणातील तक्रार यूपीएससीने केली आहे, ज्यामध्ये बनावट आणि फसवणूक केल्याचा आरोप करण्यात आला आहे. पूजाला अटक होण्याचा धोका असल्याचे त्यांनी सांगितले. पूजा खेडकर या प्रशिक्षणार्थी अधिकारी आहेत, त्यामुळे तिला नियमानुसार काही अधिकार आहेत, असे तिच्या वकिलांनी सांगितले. अटकपूर्व जामीन फेटाळल्यामुळे पूजा खेडकरला कोणत्याही क्षणी अटक होण्याची शक्यता आहे.

पूजा खेडकर प्रकरणात रोज नवनवीन खुलासे होत आहेत. आता पूजा खेडकरच्या अपंग प्रमाणपत्राबाबत नवा खुलासा समोर आला आहे. अपंग प्रमाणपत्र मिळवण्यासाठी पूजा खेडकर यांनी दिलेला पत्ता हा कारखान्याचा पत्ता असल्याचे सांगण्यात येत आहे. एवढेच नाही तर अपंगत्वाच्या प्रमाणपत्रासाठी आधारकार्ड असणे आवश्यक असताना पूजाने रेशनकार्डसाठी अर्ज केला होता आणि तिचे उत्पन्न ५ लाख रुपये असल्याचे जाहीर केले होते.

पूजा खेडकर यांच्या कुटुंबावर बेहिशेबी संपत्ती जमा केल्याचा आरोप होता. याबाबतची तक्रार पुणे एसीबी कार्यालयातही करण्यात आली आहे. बुधवारी पुणे एसीबीने खेडकर कुटुंबीयांच्या नावे असलेल्या बेहिशेबी मालमत्तेची चौकशी करण्याचा निर्णय घेतला आहे. पूजा खेडकरचे आई-वडील सध्या फरार असून पोलीस त्यांचा शोध घेत आहेत. पूजा खेडकरचे वडील दिलीप खेडकर हे क्लास वन प्रशासकीय अधिकारी आहेत. निवृत्तीनंतर त्यांनी लोकसभा निवडणूकही लढवली आहे. याशिवाय अनेक ठिकाणी जमिनीही खरेदी करण्यात आल्या आहेत. जमिनीच्या वादातूनच पुण्यातील दौंड पोलिस ठाण्यात पूजा खेडकरचे वडील दिलीप खेडकर आणि आई मनोरमा खेडकर यांच्यासह सात जणांविरुद्ध शेतकऱ्यांसमोर पिस्तुल उगारल्याप्रकरणी गुन्हा दाखल करण्यात आला आहे.