बांगलादेशातील वाढत्या जनक्षोभाच्या पार्श्वभूमीवर पंतप्रधान शेख हसीना यांनी राजीनामा देऊन देश सोडल्यानंतर गाझियाबादमधील हिंडन एअरबेसवर उतरल्या आहेत. गेल्या 2 तासांपासून ती हिंडन एअरफोर्समध्ये थांबल्या आहेत. यादरम्यान राष्ट्रीय सुरक्षा सल्लागार अजित डोवाल यांनी देखील हसीना शेख यांची भेट घेतली. दरम्यान, बांगलादेशमध्ये अंतरिम सरकार स्थापनेची प्रक्रिया सुरू झाली आहे. बांगलादेशचे लष्करप्रमुख वकार उझ झमान यांनी आंदोलकांना शांतता आणि सहकार्याचे आवाहन केले आहे. बांगलादेशात अंतरिम सरकार स्थापन केले जाईल, असे त्यांनी म्हटले आहे. हिंसाचारातून आम्हाला काहीही साध्य होणार नाही, सर्व अतिरेकांची चौकशी केली जाईल.

बांगलादेशमध्ये सुरू असलेल्या हिंसाचाराच्या पार्श्वभूमीवर पंतप्रधान शेख हसीना यांनी देश सोडल्यानंतर लष्करप्रमुख जनरल वकार-उझ-झमान यांनी प्रथमच देशातील नागरिकांना संबोधित केले. शेख हसीना यांच्या राजीनाम्यानंतर त्यांनी जाहीर केले की, ”आता अंतरिम सरकार स्थापन होईल, लष्करावर विश्वास ठेवा.” दरम्यान, मोठ्या संख्येने आंदोलक पंतप्रधानांच्या निवासस्थानी दाखल झाले आहेत.

बांगलादेशच्या लष्करप्रमुखांनी देशाला संबोधित करताना सांगितले की ”पंतप्रधान शेख हसीना यांनी आपल्या पदाचा राजीनामा देऊन देश सोडला आहे. देशात शांतता आणि सुव्यवस्था राखा. चला एकत्र काम करूया. लढून काही मिळणार नाही. आम्ही मिळून बांगलादेशला एक सुंदर देश बनवले आहे. सर्व राजकीय पक्षांशी अर्थपूर्ण चर्चा करून आम्ही अंतरिम सरकार स्थापन करण्याचा निर्णय घेतला आहे, असे लष्करप्रमुख जमान यांनी सांगितले. परिस्थिती सोडवण्यासाठी आम्ही आता अध्यक्ष मोहम्मद शहाबुद्दीन यांच्याशी चर्चा करू. त्यांनी सर्वांना निषेधाच्या नावाखाली हिंसाचार थांबविण्याचे आवाहन केले आणि नवीन सरकार भेदभाव विरोधी विद्यार्थी आंदोलनादरम्यान झालेल्या सर्व मृत्यूंना न्याय मिळवून देईल असे आश्वासन दिले.”