बांगलादेशातील आंदोलनाने आता हिंसक वळण घेतले आहे. बांगलादेशात आरक्षणाच्या मुद्द्यावरून सुरू झालेली निदर्शने आता नियंत्रणाबाहेर गेल्याचे चित्र समोर आले आहे. देशभरात हिंसाचार मोठ्या प्रमाणात वाढला आहे. देशातील बिकट परिस्थिती पाहता शेख हसीना यांनी पंतप्रधानपदाचा राजीनामा दिला असून त्यांनी बांगलादेश सोडला आहे, आणि भारतात दाखल झाल्या आहेत. आता बांग्लादेशमध्ये लष्करी नेतुत्वात सरकार स्थापन केले जाणार आहे. शेजारील बांगलादेशातील अशांततेचा प्रभाव पश्चिम बंगालवर पडू नये यासाठी बीएसएफ कडक नजर ठेवत आहे. राज्य पोलीसही सक्रिय आहेत. केंद्र सरकारने कूचबिहारमधील चंगरबंध सीमा सील केली आहे. बांगलादेशात गेलेल्या 190 ट्रक चालकांना सोमवारी संध्याकाळी चांगरबंधा सीमेवरून भारतात आणण्यात आले.

सोमवारी सकाळपासून बांगलादेशसह उत्पादनांची आयात-निर्यात बंद करण्यात आली होती. संध्याकाळी बांगलादेशातून १९० ट्रक चालकांना भारतात परत आणण्यात आले. मात्र काही ट्रकचालक अजूनही तिथेच अडकून पडले आहेत. अनेक बांगलादेशी ट्रक चालकही भारतात अडकून पडले आहेत. ट्रक चालकांना भारतात परत आणल्यानंतर कूचबिहारचे अतिरिक्त पोलिस अधीक्षक सनातन गराई यांनी पुष्टी केली.

दरम्यान, भारत-बांगलादेश सीमेवर कडेकोट बंदोबस्त ठेवण्यात आला आहे. उत्तरेकडील चांगरबांध, हिलीपासून दक्षिणेतील संदेशखळीपर्यंत सर्वत्र कडेकोट बंदोबस्त ठेवण्यात आला आहे. पेट्रापोल सीमेवर भारतीय लष्कर सक्रिय आहे. नादियाच्या छपरा सीमेवरही कडक पाळत ठेवण्यात आली आहे. बांगलादेशातील परिस्थितीची माहिती मिळताच बीएसएफचे डीजी दलजीत सिंह चौधरी यांनी कोलकाता येथील मुख्यालय गाठले. येथे त्यांनी बीएसएफच्या संबंधित वरिष्ठ अधिकाऱ्यांसोबत उच्चस्तरीय बैठक घेतली असून भारत-बांगलादेश सीमेवर सुरक्षा बळकट करण्याच्या सूचना दिल्या आहेत. वरिष्ठ अधिकाऱ्यांवर विविध क्षेत्रांची जबाबदारी सोपवण्यात आली असून बांगलादेशातून भारतीय सीमेकडे येणाऱ्या प्रत्येक व्यक्तीवर बारीक नजर ठेवण्यात येत आहे.

डीजी दलजीत सिंग चौधरी सध्या सुंदरबनला गेले आहेत आणि त्यांनी येथील बीएसएफच्या तयारीचा आढावा घेतला आहे. हा भाग समुद्रमार्गे बांगलादेशशी जोडला गेला असून अनेक बेटांमधून भारतीय हद्दीत प्रवेश करण्याचे अनेक मार्ग आहेत. डीजी दलजीत सिंग चौधरी यांनी अधिकाऱ्यांना प्रत्येक कोपऱ्यावर बारीक लक्ष ठेवण्याच्या सूचना दिल्या आहेत. यासोबतच तटरक्षक दलालाही सतर्क ठेवण्यात आले आहे, जेणेकरून कोणत्याही प्रकारची घुसखोरी उत्तम समन्वयाने रोखता येईल.