Neeraj Chopra : भारताचा स्टार भालाफेकपटू नीरज चोप्राने पॅरिस ऑलिम्पिक २०२४ मध्ये रौप्य पदक जिंकले आहे. 8 ऑगस्ट (गुरुवार) पॅरिसमधील स्टेड डी फ्रान्स येथे खेळल्या गेलेल्या अंतिम सामन्यात नीरजने दुसऱ्या प्रयत्नात 89.45 मीटर भालाफेक केला. या मोसमात नीरजचा हा सर्वोत्तम थ्रो होता. नीरजने सलग दुसऱ्या ऑलिम्पिक स्पर्धेत पदक जिंकले आहे. ऑलिम्पिकमध्ये वैयक्तिक स्पर्धेत दुसरे पदक जिंकणारा नीरज हा पहिला भारतीय खेळाडू ठरला आहे. एक सुवर्ण आणि एक रौप्यपदक जिंकणारा नीरज हा पहिला भारतीय खेळाडू आहे.
तर पाकिस्तानच्या अर्शद नदीमने पॅरिस ऑलिम्पिक 2024 मध्ये पुरुषांच्या भालाफेकमध्ये सुवर्णपदक जिंकले. तर ग्रेनेडाचा अँडरसन पीटर्स कांस्यपदक जिंकण्यात यशस्वी ठरला. अर्शद नदीमने 92.97 मीटरचा दुसरा थ्रो केला, हा ऑलिम्पिक विक्रम आहे. यावेळी अर्शदने नॉर्वेच्या अँड्रियास थॉर्किलडसेनचा विक्रम मोडला आहे. अँड्रियासने 23 ऑगस्ट 2008 रोजी बीजिंग ऑलिम्पिकमध्ये 90.57 मीटर भालाफेक करून हा विक्रम केला होता.
नीरज चोप्राने टोकियो ऑलिम्पिकमध्ये सुवर्णपदक जिंकले होते. 7 ऑगस्ट 2021 रोजी टोकियो ऑलिम्पिकमध्ये नीरज चोप्राने 87.58 मीटर फेक करून सुवर्णपदक जिंकले होते. पण आता नीरज पॅरिस ऑलिम्पिकमध्ये गोल्ड मिळवता आले नाही. एक थ्रो वगळता नीरज फॉर्मात दिसला नाही. नीरजने निश्चितपणे 89.45 मीटर थ्रो केला, जो त्याच्या ऑलिम्पिकमधील आतापर्यंतचा सर्वोत्तम थ्रो होता. नीरज चोप्राने पॅरिस ऑलिम्पिक स्पर्धेतील पुरुषांच्या भालाफेक स्पर्धेत पात्रतेच्या पहिल्याच प्रयत्नात ८९.३४ मीटर फेक करून अंतिम फेरी गाठली होती.
पॅरिस ऑलिम्पिकममधील भारताची कामगिरी
पॅरिस ऑलिम्पिकमध्ये भारताने आतापर्यंत 5 पदके जिंकली आहेत. यामध्ये चार कांस्य आणि एक रौप्यपदक आहे. मनू भाकरने 10 मीटर एअर पिस्तुलमध्ये प्रथम कांस्यपदक मिळवले. त्यानंतर मनू भाकरनेही मिश्र सांघिक स्पर्धेत दुसरे कांस्य मिळवले. सरबज्योत सिंगही तिच्यासोबत संघात होता. तर महाराष्ट्राच्या स्वप्नील कुसाळेने पुरुषांच्या ५० मीटर रायफल थ्री पोझिशन नेमबाजीत तिसरे कांस्यपदक जिंकले. त्यानंतर हॉकी संघाने कांस्यपदक तर नीरज चोप्राने रौप्यपदक पटकावले.
