Pune Vanraj Aandekar Murder : पुण्यातील माजी नगरसेवक वनराज आंदेकर यांच्या हत्या प्रकरणात नवीन माहिती समोर आली आहे. आंदेकर यांच्या हत्येत सख्या बहिणींनीचा हात असल्याचे समोर येत आहे, आता पोलिसांनी आंदेकर यांच्या सख्या बहिणी आणि दोन मेहुण्यांना अटक केली आहे.
या प्रकरणी पोलिसांनी चार जणांना अटक केल्याची माहिती पुणे शहर सहआयुक्त रंजन कुमार शर्मा यांनी दिली आहे. राष्ट्रवादीचे माजी नगरसेवक वनराज आंदेकर यांची काल डोक्यात कोयता आणि गोळ्या झाडून हत्या करण्यात आली. ही घटना नाना पेठ परिसरात घडली. घटनेची माहिती मिळताच पोलिसांनी घटनास्थळी धाव घेतली नंतर आंदेकर यांना रुग्णालयात नेण्यात आले मात्र, त्यापूर्वीच त्यांचा मृत्यू झाला होता.
आंदेकर यांनी हत्या झाल्यानंतर त्यांच्या नातेवाईकांवर खुनाचा संशय व्यक्त होत होता. मात्र, आता आंदेकरांच्या वडिलांनी त्यांच्याच मुलींविरोधात केलेल्या तक्रारीनंतर पोलिसांनी ही अटक कारवाई सुरू केली आहे.
पुणे पोलिसांनी वनराज आंदेकर याचे मेहुणे जयंत कोमकर, गणेश कोमकर आणि बहिणी संजीवनी कोमकर अन् कल्याणी कोमकर यांना अटक केली आहे. रविवारी रात्री घडलेल्या या घटनेनंतर पोलिसांनी १२ तासांच्या आत ही कारवाई केली आहे, या प्रकरणाचा पुढील तपास सुरु असून, पोलिसांनी या प्रकरणी आणखी चौघांना अटक करण्यात आली आहे.
