Anil Deshmukh : माजी गृहमंत्री आणि राष्ट्रवादी काँग्रेस शरदचंद्र पवार पक्षाचे नेते अनिल देशमुख यांच्या अडचणी पुन्हा वाढताना दिसत आहेत. सीबीआयने त्यांच्यावर आणखी एक गुन्हा दाखल केला आहे. भाजपचे नेते गिरीश महाजन यांना एका गुन्ह्यात अडकवण्यासाठी पोलिस अधिक्षकांवर दबाव टाकल्याचा आरोप देशमुखांवर करण्यात आला आहे.
जळगावचे तत्कालीन पोलिस अधिक्षक प्रवीण मुंढे यांच्या जबाबामध्ये देशमुखांनी धमकावल्याचा उल्लेख आहे. त्याआधारे सीबीआयने देशमुकांना आरोपी केले आहे. या गुन्ह्यात तत्कालीन विशेष सरकारी वकील प्रवीण चव्हाण हेही आरोपी आहेत.
काय आहे प्रकरण?
या सगळ्या प्रकरणावर काही दिवसांपूर्वीच गिरीश महाजन यांनी पत्रकार परिषदेत आपली बाजू मांडली होती. यावेळी त्यांनी महाविकास आघाडी सरकार असताना त्यांना मोक्का अंतर्गत अटक करण्यासाठी अनिल देशमुख यांनी खोटा गुन्हा दाखल करण्याचा प्रयत्न केला होता असा गंभीर आरोप केला होता. तसेच हा संपूर्ण प्रकार प्रवीण मुंडे यांनीच माझ्या लक्षात आणून दिल्यानंतर मी या संदर्भात अनिल देशमुख यांना जाब विचारला होता असे देखील गिरीश महाजन यांनी म्हटलं होतं. आता याप्रकरणी नुकतच सीबीआयकडून चौकशी करण्यात आली असून आता अनिल देशमुख यांचे विरोधात गुन्हा दाखल करण्यात आला आहे. अशा स्थितीत त्यांना पुन्हा अटक होण्याची शक्यता वर्तवली जात आहे.
याआधी त्यांच्यावर शंभर कोटींच्या वसुलीचा आरोप करण्यात आला होता. याप्रकरणी त्यांना अटक करण्यात आली होती. काही महिन्यांपूर्वीच ते जामीनावर जेलमधून बाहेर आले आहेत.
गुन्हा दाखल झाल्यानंतर फडणवीसांवर साधला निशाणा
गुन्हा दाखल झाल्यानंतर देशमुख यांनी X वर पोस्ट शेअर करत आपली प्रतिक्रिया दिली आहे. याबाबत त्यांनी भाजपवर हल्लाबोल केला असून, अशा धमक्या आणि दबावाला मी अजिबात घाबरत नाही, असे म्हणत उपमुख्यमंत्री देवेंद्र फडणवीस यांच्यावर निशाणा साधला आहे.
‘X’ वर त्यांनी लिहिले, “धन्यवाद… देवेंद्र फडणवीस. सीबीआयने माझ्यावर आणखी एक निराधार गुन्हा दाखल केला आहे. ”आज माझ्यावर सीबीआयकडून आणखी एक तथ्यहीन गुन्हा दाखल केला गेला आहे. जनतेचा कौल बघून फडणवीसांच्या पायाखालची वाळू घसरल्याने हे कटकारस्थान सुरू झाले आहे. या अशा धमक्यांना आणि दबावाला मी अजिबात भीक घालत नाही. महाराष्ट्रात फडणवीसांकडून किती खालच्या पातळीचे आणि विकृत मानसिकतेचे घाणेरडे राजकारण सुरू आहे ते जनतेने बघावे. लोकसभा निवडणुकीत या कारस्थानी नेतृत्वाला जनतेने जागा दाखवून दिली आहे, आता महाराष्ट्राची जनता विधानसभा निवडणुकीची वाट बघत आहे,’ अशी पोस्ट त्यांनी केली आहे.
