कोलकात्याच्या आरजी कर मेडिकल कॉलेज आणि रुग्णालयातील(R G Kar Medical College and Hospital) डॉक्टर तरुणीवरील बलात्कार आणि हत्या प्रकरणाला एक महिना उलटला आहे.या घटनेवरून देशभरातून अजूनही संतप्त प्रतिक्रिया व्यक्त होत आहेत. तसेच या प्रकरणावरून पश्चिम बंगालमध्ये डॉक्टरांनी संप पुकारला आहे. यामुळेच आंदोलनकर्त्या डॉक्टरांना बैठकीसाठी बोलावण्यात आले होते परंतु मुख्यमंत्री ममता बॅनर्जी (Mamata Banerjee ) यांच्यासोबत बैठक घेण्यास डॉक्टरांनी नकार दिला आहे. यावरून आता मला सत्तेची भूक नाही लोकांना माझी खुर्ची हवी आहे यामुळे मी राजीनामा देण्यास तयार आहे असे म्हणत ममता बॅनर्जी यांनी सत्ता सोडण्याची तयारी दर्शवली आहे. याचसोबत बंगालची जनता वाट पाहत होती की निदान आज तरी तोडगा निघेल पण ही बैठक होऊ शकली नाही यामुळे मी बंगालच्या जनतेची हात जोडून माफी मागते असे वक्तव्य ममता बॅनर्जी यांनी केले आहे.

सर्वोच्च न्यायालयाच्या आदेशानंतर पश्चिम बंगाल सरकारने आंदोलन करणाऱ्या ज्युनियर डॉक्टरांना चर्चेसाठी बोलावले होते. परंतु आंदोलक डॉक्टरांनी चर्चा करण्यास नकार दिला आहे. मात्र आंदोलनकर्त्या डॉक्टरांना या बैठकीचे लाईव्ह स्ट्रिमिंग हवे होते आणि ते लाईव्ह स्ट्रिमिंग करण्यावर ठाम राहिल्याने बैठक होऊ शकली नाही.

दरम्यान, ममता बॅनर्जी बैठक घेण्यासाठी उपस्थित होत्या परंतु 2 तासांपेक्षा जास्त वेळ वाट पाहून देखील आंदोलक डॉक्टर त्या ठिकाणी उपस्थित राहिले नाहीत. यावरून आता कोणतीही बैठक झाली तर ती मुख्य सचिव आणि इतर अधिकाऱ्यांसोबत असेल असे वक्तव्य ममता बॅनर्जी यांनी केले आहे. मी तीन वेळा प्रयत्न करून देखील डॉक्टरांशी बैठक होऊ शकली नाही राज्यात उपचाराअभावी 27 जणांचा मृत्यू झाला तरीदेखील डॉक्टर संपावर आहेत असे त्या म्हणाल्या आहेत.

दरम्यान, ममता बॅनर्जी यांच्यासोबतच्या चर्चेसाठी 15 कनिष्ठ डॉक्टरांच्या शिष्टमंडळाला बोलावले होते. मात्र, या बैठकीच्या लाईव्ह स्ट्रिमिंगवर सरकारने बंदी घातली होती. यामुळे ज्युनिअर डॉक्टर सभेच्या ठिकाणी पोहोचले मात्र आत गेले नाहीत.लाईव्ह स्ट्रिमिंगशिवाय बैठक घेण्यास डॉक्टरांनी नकार दिला त्यामुळे ही बैठक पार पडली नाही.