मालवण येथील राजकोट किल्ल्यावर छत्रपती शिवाजी महाराजांचा पुतळा कोसळल्याची घटना घडली होती .छत्रपती शिवाजी महाराजांचा पुतळा बनवणाऱ्या जयदीप आपटे ( Jaydeep Apte ) आणि त्याचा सल्लागार चेतन पाटील ( Chetan Patil ) यांना पोलिसांनी अटक केली होती. या घटनेबाबत न्यायालयात सुनावणी झाली असून आरोपी शिल्पकार जयदीप आपटे याला येत्या २४ सप्टेंबरपर्यंत न्यायालयीन कोठडी सुनावण्यात आली आहे तर त्याचा बांधकाम सल्लागार चेतन पाटील याचाही जामीन न्यायालयाकडून फेटाळला गेला असून त्याच्याही कोठडीत वाढ झाली आहे.
या घटनेतील आरोपीला लवकरात लवकर कठोर शिक्षा व्हावी अशी मागणी सर्व शिवभक्तांकडून करण्यात येत आहे. छत्रपती शिवाजी महाराजांचा पुतळा कोसळल्याची घटना घडल्यानंतर राजकीय वर्तुळात अनेक टीका टिप्पणी केली गेली. या घटनेमुळे आंदोलन देखील करण्यात आले होते. अवघ्या 8 महिन्यांच्या बांधकामानंतर छत्रपती शिवाजी महाराजांचा पुतळा कोसळल्यामुळे विरोधकांने देखील सरकारवर जोरदार टीका केली होती.
छत्रपती शिवाजी महाराजांचा पुतळा कोसळल्याची घटना घडल्यानंतर पुतळा बनवणारा जयदीप आपटे तब्बल 11 दिवस फरार होता. यानंतर पोलिसांना त्याला पकडण्यास यश मिळाले होते. याआधी देखील छत्रपती शिवाजी महाराजांचा पुतळा कोसळल्याच्या घटनेची न्यायालयात सुनावणी झाली होती. त्यावेळी न्यायालयात झालेल्या सुनावणीमध्ये न्यायालयाने जयदीप आपटे याला 13 सप्टेंबरपर्यंत पोलिस कोठडीत ठेवण्याचे आदेश दिले होते तसेच न्यायालयाकडून चेतन पाटील याला न्यायालयीन कोठडी सुनावण्यात आली होती.
दरम्यान, आज पुन्हा एकदा या प्रकरणावर सुनावणी करण्यात आली असून जयदीप आपटेला २४ तारखेपर्यंत न्यायालयीन कोठडीत पाठवले गेले आहे तर त्याचा बांधकाम सल्लागार चेतन पाटील याचा जामीन न्यायालयाने फेटाळला असून त्याला १९ तारखेपर्यंत पोलिस कोठडी सुनावण्यात आली आहे.
