Ganesh Visarjan 2024 : गेल्या १० दिवसांपासून अवघ्या महाराष्ट्राचं वातावरण भक्तिमय करून टाकणाऱ्या गणेशोत्सवाचा आज शेवटचा दिवस असून, आज अनंत चतुर्थीच्या मुहूर्तावर लाडक्या बाप्पाला निरोप देण्याची वेळ आली आहे. आज सकाळपासूनच गणपती विसर्जन मिरवणुकीला सुरुवात झाली असून, पुण्यातील मानाच्या गणपतींचे विसर्जन सुरु झाले आहे.
पुण्यातील मानाच्या पहिल्या आणि दुसऱ्या गणपती बाप्पाचे विसर्जन झाले आहे. तर मानाचा तिसरा गुरुजी तालीम गणपती अलका चौकात दाखल झाला आहे. थोड्याच वेळात आता तिसऱ्या मनाच्या गणपतीचे देखील विसर्जन होईल.
पहिल्या श्री कसाब गणपतीचे विसर्जन झाल्यानंतर दुसऱ्या श्री तांबडी जोगेश्वरी गणपतीचे विसर्जन अगदी थाटात करण्यात आले. तर तांबडी जोगेश्वरी गणपतीचे विसर्जन त्याच्या थोड्याच वेळानंतर करण्यात आले. दोन्ही बाप्पाची मिरवणूक आकर्षक ठरली. ढोल-ताशांच्या गजरात बाप्पाची मिरवणूक काढण्यात आली. बाप्पाला निरोप देताना यावेळी गणेश भक्तांचे डोळे पाणावलेले पाहायला मिळाले.
दरवर्षीप्रमाणे यावर्षीही गुलालाची उधळण, गुलाबी झालेले सगळे कार्यकर्ते, ढोल ताशांचा जोरदार गजर तसेच नागरिकांचा उत्साह पाहण्यासारखा होता. बाप्पाच्या मिरवणुकीला सगळे गणेशभक्त बाप्पाच्या भक्तीत नाचताना गणरायाला निरोप देताना दिसले. या मिरवणुकीत पुण्यातील नंबर वन नादब्रह्म ढोल ताशा पथकाने नेहमीप्रमाणे आकर्षक वादन करत गणेश भक्ताचे लक्ष वेधून घेतले. आणि वादनाच्या आवाजाने सगळीकडे वातावरण प्रसन्न केले.
