आगामी विधानसभा निवडणुकीच्या (Vidhansabha Elections 2024 ) पार्श्वभूमीवर राजकीय वर्तुळात आरोप प्रत्यारोपाचे सत्र सुरूच आहे. मंत्री गिरीश महाजन (Girish Mahajan) यांनी निवडणुकींच्या पार्श्वभूमीवर आता मोठे वक्तव्य केले आहे. महायुतीचेच सरकार विधानसभा निवडणुकीत मोठ्या मताधिक्याने येणार असे भाष्य मंत्री गिरीश महाजन यांनी जळगावमध्ये (Jalgao) प्रसार माध्यमांशी बोलताना केले आहे.

गणपती बाप्पाचे आमच्यावर आशीर्वाद आहेत. त्याला काय करायचे आहे हे माहित आहे. तसेच जनतेला सुखी ठेव दुष्काळ पडू देऊ नको अशी मागणी आपण गणपती बाप्पाकडे केली असे मंत्री गिरीश महाजन यांनी सांगितले आहे. यावेळी गिरीश महाजन यांना दिलीप खोडपे यांच्या बद्दल प्रश्न विचारण्यात आला तेव्हा त्यांनी याबाबत बोलण्यास नकार दिला आहे.

आता कोणीही विरोधात येऊ द्या, फक्त गंमत बघा. घोडा अन् मैदान समोरच आहे. तसेच गेल्या सहा-सात टर्मपासून आपल्या विरोधात अनेक जण लढा देऊन थकले आहेत. निवडणूक संपल्यावर माझ्याशी बोला, असे देखील गिरीश महाजन यावेळी बोलताना म्हणाले आहेत. त्यांनी यावेळी निवडणूक जिंकून येण्याचा विश्वास व्यक्त केला आहे.

दरम्यान, आगामी विधानसभा निवडणुकीत गिरीश महाजन यांना राष्ट्रवादी शरद पवार गटाकडून दिलीप खोडपे मोठे आव्हान देऊ शकतात अशा चर्चा रंगत आहेत. दिलीप खोडपे यांनी शरद पवारांच्या राष्ट्रवादीत नुकताच प्रवेश केला आहे.