आज सकाळी पंतप्रधान नरेंद्र मोदी (Narendra Modi) अमेरिका दौऱ्यावर रवाना झालेले आहेत. पंतप्रधान नरेंद्र मोदींचा हा तीनदिवसीय दौरा असणार आहे. यावेळी पंतप्रधान मोदी क्वाड समिटमध्ये सहभागी होणार आहेत. यादरम्यान अनेक द्विपक्षीय बैठका होण्याची शक्यता वर्तवली जात आहे. तसेच पंतप्रधान नरेंद्र मोदी न्यूयॉर्कमध्ये संयुक्त राष्ट्र महासभेत भविष्यातील शिखर परिषदेला संबोधित करणार आहेत. तसेच पंतप्रधान नरेंद्र मोदी अनिवासी भारतीयांशी देखील  संवाद देखील साधणार आहेत.अमेरिकेचे माजी राष्ट्राध्यक्ष आणि रिपब्लिकन पक्षाचे अध्यक्ष पदाचे उमेदवार डोनाल्ड ट्रम्प मोदींची भेट घेणार असल्याचे वृत्त समोर आले आहे.

राष्ट्राध्यक्ष जो बायडेन यांनी विल्मिंग्टन आणि न्यूयॉर्कमध्ये संयुक्त राष्ट्र क्वाड समिटचे आयोजन केले आहे. या क्वाड समिटमध्ये मी भाग घेणार आहे. मी माझे सहकारी राष्ट्राध्यक्ष बिडेन, पंतप्रधान अल्बानीज आणि पंतप्रधान किशिदा यांच्यासोबत क्वाड समिटमध्ये सामील होण्यास उत्सुक आहे असे देखील पंतप्रधान नरेंद्र मोदी म्हणाले आहेत.

आतापर्यंत पंतप्रधानांनी 8 वेळा अमेरिकेला भेट दिली आहे आणि आता ते अमेरिकेच्या नवव्या दौऱ्यावर आहेत.

जो बायडेन यांनी आयोजित केलेल्या क्वाड समिटमध्ये ऑस्ट्रेलिया, भारत, जपान आणि अमेरिका या चार देशांचा समावेश आहे. तसेच भारत २०२५ मध्ये क्वाड लीडर्स समिटचे आयोजन करणार आहे असे देखील सांगितले गेले आहे. हि क्वाड कॉन्फेरन्स सागरी सुरक्षेवर भर देणार असल्याचे म्हटले जात आहे.

दरम्यान, आज पंतप्रधान नरेंद्र मोदी विल्मिंग्टन, डेलावेअर येथे चौथ्या क्वाड लीडर्स समिटमध्ये सहभागी होतील. यानंतर उद्या ते न्यू जर्सी येथे भारतीय समुदायाशी संबंधित कार्यक्रमात सहभागी होतील. पीएम मोदी त्यांच्या दौऱ्याच्या शेवटच्या दिवशी म्हणजे 23 सप्टेंबर रोजी संयुक्त राष्ट्रांच्या ‘समिट ऑफ द फ्युचर’मध्येही सहभागी होणार आहेत असे सांगण्यात आले आहे.