Eknath Shinde News : रविवारी नागपूर येथील एका कार्यक्रमात शिवसेना ठाकरे (Uddhav Thackeray) गटाचे प्रमुख उद्धव ठाकरे यांनी महायुती सरकारवर जोरदार टीका केली होती. तसेच राज्य सरकारची सर्वात चर्चेत असलेली लाडकी बहीण या योजनेवरून देखील सरकारवर टीका केली होती. या टीकेनंतर आता मुख्यमंत्री एकनाथ शिंदे (Eknath Shinde)  यांनी ट्विट करत उद्धव ठाकरे यांना प्रत्युत्तर दिले आहे. या ट्विटमध्ये एकनाथ शिंदे यांनी जिव्हारी लागणारी टीका केली आहे.

ट्विट मध्ये काय म्हणाले मुख्यमंत्री एकनाथ शिंदे ?

“काही नेते हताश आणि हरलेल्या मानसिकतेने संघटना चालवत आहेत हे पुन्हा एकदा सिद्ध झाले आहे. मुख्यमंत्रिपदाचा चेहरा करा या मागणीसाठी हातात कटोरा घेऊन दिल्लीचे उंबरे झिजवणे, ही भीक असते. वसुली प्रकरणात तुरुंगात जाऊन आलेल्या आणि शेतकऱ्यांची बँक गिळली म्हणून न्यायालयाने शिक्षा ठोठावलेल्या लोकांच्या बाजूला बसून भ्रष्टाचाराबद्दल बाता करण्यासारखा कोडगेपणा नाही”, असा हल्लाबोल एकनाथ शिंदे यांनी केला.

उद्धव टाकरेंची देण्याची दानतच नाही लोकांना काहीच देऊ शकणार नाहीत, अशी त्यांनी कबूल करून टाकली ते बरे केले. कुणालाच काही देण्याचे यांना माहीतच नाही. यांना फक्त घेणे माहीत आहे. यांच्याकडे दानत नाहीच. आमच्या लाडक्या बहिणींना दिलेले पंधराशे रुपयेही तुमच्या डोळ्याला टोचतात. बहिणीला ओवाळणी देण्याची संस्कृतीही यांना मान्य नाही? त्यामुळेच आता मिळतात अगदी तेवढे पैसेही बहिणींना देणार नाही, असे हे सांगतात. त्यांची महिला वर्गाबद्दलची आस्थाही यांच्या हिंदुत्वासारखीच बेगडी आहे” असं ट्विटमध्ये म्हटलंय.

पुढे उद्धव ठाकरेंवर भ्रष्ट्राचाराचे आरोप करत म्हटलं आहे की, “कोविड रुग्णांच्या तोंडची खिचडी खाणाऱ्या, बॉडी बॅगमधूनही कमिशन ओरपणाऱ्या लोकांनी भ्रष्टाचार हा शब्द बोलण्याची हिंमत करावी? राज्यातील पायाभूत सुविधांना गती देण्यासाठी केंद्र सरकारकडून मिळणारा पाठिंबा आणि सढळ हस्ताने होणाऱ्या मदतीला भीक म्हणून संबोधत हेटाळणी करणारे, विरोध करणारेच खरे महाराष्ट्रद्वेष्टे आहेत. शेतकऱ्यांच्या कर्जमाफीची घोषणा तुम्ही केली, पण पैसे आमच्या सरकारने दिले, हे ध्यानात ठेवा.”

काही नेते हताश आणि हरलेल्या मानसिकतेने संघटना चालवत आहेत हे पुन्हा एकदा सिध्द झालं.

मुख्यमंत्रिपदाचा चेहरा करा या मागणीसाठी हातात कटोरा घेऊन दिल्लीचे उंबरे झिजवणे, ही भीक असते.

वसुली प्रकरणात तुरुंगात जाऊन आलेल्या आणि शेतकऱ्यांची बँक गिळली म्हणून न्यायालयाने शिक्षा ठोठावलेल्या…

— Eknath Shinde – एकनाथ शिंदे (@mieknathshinde) September 29, 2024

पुढे त्यांनी मोदी-शाहांवर बोलण्याची तुमची पात्रता नाही असे देखील म्हंटल आहे. “देशाचे पंतप्रधान नरेंद्र मोदी व गृहमंत्री अमित शाह यांच्यावर बोलण्याची आपली पात्रता आहे का हे जरा काही जणांनी आरशात बघावे. बाळासाहेबांनी राजकारण व हिंदुत्वाची गल्लत केली, असे बोलणाऱ्यांना त्यांचे नाव घेण्याचा नैतिक अधिकार तरी उरला आहे का? हिंदुत्व हा शब्द आता त्यांच्या तोंडात शोभतच नाही. निवडणुकीला घाबरणाऱ्यांनी डिपॉझिट जप्त करण्याची भाषा तर करूच नये. अन्यथा निवडणुकीच्या रिंगणात उतरावे”, असं चॅलेन्ज यावेळी शिंदेंनी उद्धव ठाकरेंना दिलंय.

पुढे ट्विटमध्ये म्हंटलय, “महाराष्ट्र हा कणखर, रांगड्या, राकट लोकांचा देश आहे. इथे असे “माझी बाहुली हरवली, माझी सावली हरवली” म्हणून भोकाड पसरणारे नेते लोकांना आवडत नाहीत. या घरबशांना लोक पुन्हा कायमचे घरी बसवल्याशिवाय राहणार नाहीत. भाजपचे हिंदुत्व मान्य आहे का, असा प्रश्न नागपूरमध्ये सरसंघचालकांना विचारला गेला. तुम्ही तुमच्या शिवसेनेचेच हिंदुत्व बासनात बांधले…ते आधी लोकांसमोर कबूल करा”, अशी टीका देखील एकनाथ शिंदे यांनी केली आहे.