Nayab Singh Saini : नायब सिंग सैनी (Nayab Singh Saini) यांनी पुन्हा एकदा हरियाणाच्या (Haryana) मुख्यमंत्रिपदाची शपथ घेतली आहे. सैनी यांच्यासह त्यांच्या कॅबिनेट मंत्र्यांनीही शपथ घेतली आहे. नायब सिंग सैनी यांनी सलग दुसऱ्यांदा हरियाणाच्या मुख्यमं त्रीपदाची शपथ घेतली आहे.
शपथविधी सोहळ्याला पंतप्रधान नरेंद्र मोदी, गृहमंत्री अमित शहा, केंद्रीय संरक्षण मंत्री राजनाथ सिंह आणि केंद्रीय मंत्री नितीन गडकरी यांच्यासह भारतीय जनता पक्षाचे (भाजप) अनेक ज्येष्ठ नेते उपस्थित होते. यावेळी भाजपशासित राज्यांचे मुख्यमंत्रीही उपस्थित होते. नायबसिंग सैनी यांचा शपथविधी सोहळा पंचकुला येथील दसरा मैदानावर आयोजित करण्यात आला होता.
यावेळी भाजपचे ज्येष्ठ नेते आणि अंबाला कँटचे आमदार अनिल विज यांनीही कॅबिनेट मंत्री म्हणून शपथ घेतली. अनिल विज यांच्यानंतर इस्रानाचे आमदार कृष्णलाल पनवार यांनी शपथ घेतली. कृष्णलाल यांच्यानंतर राव नरवीर सिंग यांनी कॅबिनेट मंत्री म्हणून शपथ घेतली. ते बादशाहपूरचे आमदार आहेत. यानंतर महिपाल धांडा यांनीही मंत्रीपदाची शपथ घेतली. धांडा हे पानिपत ग्रामीणचे आमदार आहेत. विपुल गोयल यांनाही कॅबिनेट मंत्री करण्यात आले आहे. डॉ. अरविंद शर्मा गोहाना हेही कॅबिनेट मंत्री झाले. त्याचबरोबर श्यामसिंह राणा यांना राज्यमंत्री करण्यात आले आहे. ते रादौरचे आमदार आहेत. बरवाला येथील रणवीर सिंग गंगवा हेही राज्यमंत्री झाले आहे. रणवीर सिंगनंतर कृष्णा बेदी यांनी नरवाना राज्यमंत्री म्हणून शपथ घेतली. श्रुता चौधरी यांनाही राज्यमंत्री करण्यात आले आहे. आरती राव यांनी राज्यमंत्रिपदही स्वीकारले आहे. राजेश नागर आणि गौरव गौतम यांनाही राज्यमंत्री करण्यात आले आहे.
नायबसिंग सैनी यांनी शपथ घेण्यापूर्वी २४ हजार तरुणांना नियुक्तीपत्र वाटप करण्याचे आश्वासन दिले होते. 17 ऑक्टोबर रोजी शपथ घेण्यापूर्वी या तरुणांना नियुक्तीपत्र देणार असल्याचे त्यांनी बुधवारी सांगितले होते. यावेळी सैनी म्हणाले की, निवडणुकीच्या प्रचारादरम्यान आम्ही राज्यातील तरुणांना हे वचन दिले होते. आता पुन्हा सत्तेत आल्यानंतर आम्ही जनतेला दिलेले वचन पूर्ण करत आहोत.
हरियाणाचे नवे मुख्यमंत्री नायब सिंग सैनी यांच्या शपथविधी सोहळ्यासह महाराष्ट्र आणि झारखंडमध्ये होणाऱ्या नवडणुकांचा प्रचार देखील केला. सत्तेत आल्यानंतर जनतेच्या हिताचे निर्णय हे आमचे पहिले प्राधान्य असेल, असा थेट संदेश भाजपने हरियाणाच्या मंचावरून देण्याचा प्रयत्न केला आहे.
या शपथविधी सोहळ्यात भाजपसोबतच एनडीएचे सर्व घटक पक्षही सहभागी झाले होते. आपल्या घटक पक्षांना एकत्र ठेवून भाजपने एनडीएमध्ये असलेली एकजूट पुन्हा एकदा दाखवून दिली. सीएम सैनी यांच्या शपथविधीमध्ये एनडीए शासित राज्यांच्या 20 मुख्यमंत्र्यांनी भाग घेतला होता. यावेळी महाराष्ट्राचे मुख्यमंत्री एकनाथ शिंदे हेही उपस्थित होते.
