Maharashtra Assembly Elections 2024 : महाराष्ट्रातील निवडणुक (Maharashtra Assembly Elections 2024) आता तोंडावर येऊन ठेपली आहे. अशातच राज्यात राजकीय घडामोडींना वेग आला आहे. अनेक पक्षांकडून त्यांच्या उमेदवारांची यादी जाहीर होण्यास सुरुवात झाली आहे. अशातच रविवारी महाराष्ट्र विधानसभा निवडणुकीसाठी भाजपने त्यांच्या उमेदवारांची पहिली यादी जाहीर केली आहे. यामध्ये पक्षाने 99 उमेदवारांची नावे जाहीर केली आहेत.

राज्यात 288 जागांसाठी एकाच टप्प्यात मतदान होणार असून, 20 नोव्हेंबरला महाराष्ट्रात विधानसभा निवडणुकीसाठी मतदान पार पडणार आहे. तर, 23 नोव्हेंबरला निकाल जाहीर होणार आहेत. अशातच आता एक मोठी बातमी समोर आली आहे. मुख्यमंत्री एकनाथ शिंदे यांनी विधानसभा उमेदवारी अर्ज भरण्याची तारीख निश्चित केली आहे.

भाजप नंतर आता महायुतीतील शिवसेना शिंदे गटाकडूनही विधानसभेची पहिली यादी लवकरच जाहीर करण्यात येणार आहे. त्यापूर्वीच मुख्यमंत्री एकनाथ शिंदे यांनी उमेदवारी अर्ज दाखल करण्याची तारीख सांगितली आहे. येत्या 24 ॲाक्टोबरला एकनाथ शिंदे हे उमेदवारी अर्ज दाखल करणार आहेत. ठाणे शहरातील कोपरी-पाचपाखाडी विधानसभा मतदारसंघातून ते त्यांचा उमेदवारी अर्ज दाखल करतील. उमेदवारी अर्ज दाखल करण्यापूर्वी एकनाथ शिंदे मोठ्या प्रमाणावर शक्तीप्रदर्शन करणार आहेत.

दरम्यान, उपमुख्यमंत्री अजित पवार (Ajit Pawar) हे देखील येत्या 28 तारखेला बारामतीमधून आपला उमेदवारी अर्ज भरणार आहेत.

विधानसभा निवडणुकीसाठी उमेदवारांना अर्ज करण्याची दाखल करण्याची शेवटची तारीख 29 ऑक्टोबर आहे. तर 30 ऑक्टोबरला अर्जांची छाननी होईल. उमेदवारांना अर्ज मागे घेण्यासाठी 4 नोव्हेंबर पर्यंत वेळ दिला आहे.