Ajit Pawar : राज्यात विधानसभा निवडणुका तोंडावर आल्या असून सर्वच पक्षांकडून जोरदार तयारी सुरु आहे. राज्यात येत्या 20 नोव्हेंबर रोजी विधानसभा निवडणूक पार पडणार असून 23 नोव्हेंबरला निवडणुकांचे निकाल लागणार आहेत. अशातच अनेक पक्षांकडून त्यांच्या उमेदवारांची यादी जाहीर करण्यात येत आहे. तसेच बड्या नेत्यांकडून उमेदवारी अर्ज भरले जात आहेत.
अर्ज भरण्याची शेवटची तारीख 29 ऑक्टोबर असल्यामुळे आज राज्यातील अनेक बडे नेते आपले उमेदवारी अर्ज दाखल करत आहेत. आज राज्याचे मुख्यमंत्री एकनाथ शिंदे यांनी उमेदवारी अर्ज भरला असून, उपमुख्यमंत्री अजित पवार यांनी देखील बारामतीतून आपला उमेदवारी अर्ज दाखल केला आहे. तर दुसरीकडे अजित पवारांचे पुतणे युगेंद्र पवार यांनी देखील बारामतीतून आपला उमेदवारी अर्ज दाखल केला आहे. अर्ज दाखल करण्यापूर्वी अजित पवारांनी बारामतीतून एक मोठे वक्तव्य केले आहे.
काय म्हणाले अजित पवार?
उमेदवारी अर्ज दाखल करण्यापूर्वी अजित पवार म्हणाले, “लोकशाहीत निवडणुकीमध्ये सर्वांना उभं राहण्याचा अधिकार आहे. माझ्या विरोधात जेव्हा-जेव्हा जे उमेदवार उभे राहिले, ते सर्वच उमेदवार मजबूत आहेत असं समजूनच माझ्या कार्यकर्त्यांनी, मी आणि माझ्या कुटुंबाने नेहमीच प्रचार केला आहे. आता या निवडणुकीत देखील बारामतीकर चांगल्या मताधिक्यांनी मला निवडून देतील असा मला विश्वास आहे”, असं अजित पवार म्हणाले आहेत.
अजित पवार पुढे म्हणाले, “त्यांनी युगेंद्र पवार यांना उमेदवारी दिली. तो त्यांचा अधिकार आहे. मी त्याबाबत जास्त काही बोलणार नाही. मात्र, त्यांनी (शरद पवार) असं करायला नको होतं. लोकसभेच्या निवडणुकीत मी सुप्रिया सुळे यांच्या विरोधात सुनेत्रा पवार यांना उमेदवारी दिली, ती माझी चूक होती. पण तीच चूक पुन्हा त्यांनी (शरद पवार यांनी) करायला नको होती, पण चूक केली आहे. आता मतदार यासंदर्भात योग्य तो निर्णय घेतील”, असं अजित पवार यांनी म्हटलं आहे.
दरम्यान, बारामती विधानसभा मतदारसंघाच्या निवडणुकीत काका-पुतण्या आमने-सामने आल्याचे पुन्हा एकदा सर्वांचे लक्ष बारामतीकडे लागून आहे. अजित पवार यांच्या विरोधात युगेंद्र पवार निवडणुकीच्या मैदानात आहेत. त्यामुळे लोकसभेच्या निवडणुकीनंतर पुन्हा एकदा बारामतीत पवार विरुद्ध पवार अशी लढत पाहायला मिळत आहे.
