US Presidential Election 2024 Survey : अमेरिकेतील निवडणूक (US Presidential Election 2024) आता चांगलीच रंगली आहे. येत्या ५ नोव्हेंबरला होणाऱ्या राष्ट्राध्यक्षपदाच्या निवडणुकीपूर्वी विरोध पक्ष एकमेकांवर आरोप प्रत्यारोप करत आहेत. रिपब्लिकन पक्षाचे उमेदवार डोनाल्ड ट्रम्प (Donald Trump)  निवडणुकीच्या मैदानात शर्थीचे प्रयत्न करत आहेत, तर डेमोक्रॅटिक पक्षाच्या उमेदवार कमला हॅरिस (Kamala Harris) देखील आपल्या पक्षाचे सरकार वाचवण्यासाठी जोरदार प्रयत्न करत आहेत.

दरम्यान, अमेरिकेतील 7 स्विंग राज्यांमधून डोनाल्ड ट्रम्प यांच्यासाठी मोठी दिलासादायक बातमी आली आहे. डोनाल्ड ट्रम्प यांनी या सात स्विंग राज्यांमध्ये कमला हॅरिस यांच्या विरोधात आघाडी घेतली आहे. आणि तेही निवडणुकांना काहीच दिवस शिल्लक असताना. निवडणुकीच्या काही दिवस आधी दोन्ही उमेदवारांनी आपली संपूर्ण ताकद या राज्यांवर केंद्रित केली आहे. जी राज्ये अमेरिकेचा पुढचा राष्ट्राध्यक्ष ठरवतील.

एक ताज्या सर्वेक्षणानुसार डोनाल्ड ट्रम्प या सर्व 7 राज्यांमध्ये कमला हॅरिस यांच्यापेक्षा पुढे आहेत. या सर्वेक्षणात ४९ टक्के लोकांनी आगामी राष्ट्राध्यक्षपदाच्या निवडणुकीत ट्रम्प यांना मतदान करणार असल्याचे सांगितले आहे. या राज्यांमध्ये ट्रम्प यांना कमला हॅरिस यांच्यापेक्षा 1.8 टक्केने आघाडी मिळाली आहे. नोव्हेंबरच्या पहिल्या दोन दिवसांत हे सर्वेक्षण करण्यात आले आणि त्यात 2500 अमेरिकन लोकांनी भाग घेतला होता. सर्वेक्षणात सहभागी बहुतेक महिला आहेत. आता निवडणुकीची रणधुमाळी अंतिम टप्प्यात पोहोचल्याने सर्वांचे लक्ष या राज्यांकडे लागले आहे. या सात राज्यांमध्ये ॲरिझोना, नेवाडा, विस्कॉन्सिन, मिशिगन, पेनसिल्व्हेनिया, नॉर्थ कॅरोलिना आणि जॉर्जियाचा समावेश आहे.

अमेरिकेत स्विंग राज्ये का महत्त्वाची आहेत?

अमेरिकेत राष्ट्राध्यक्षपदाची निवडणूक तीन प्रकारची राज्ये ठरवतात. पहिली लाल राज्ये, निळी राज्ये आणि तिसरी स्विंग राज्ये. लाल राज्य 1980 पासून ट्रम्प यांच्या रिपब्लिकन पक्षाच्या सतत नियंत्रणात आहे. तर ब्लू स्टेट्स डेमोक्रॅटिक पक्षाच्या ताब्यात आहेत. ही राज्ये 1992 पासून डेमोक्रॅटिक पक्षाच्या ताब्यात आहेत. तर स्विंग राज्यांमध्ये रिपब्लिकन आणि डेमोक्रॅटिक पक्षांमध्ये अत्यंत चुरशीची स्पर्धा आहे. या राज्यांमध्ये कोणताही उमेदवार फार कमी मतांनी जिंकू शकतो.

स्विंग राज्य म्हणजे काय?

अमेरिकेमध्ये अध्यक्षीय निवडणुकीमध्ये ५० राज्ये आणि राजधानी वॉशिंग्टन वसलेला डिस्ट्रिक्ट ऑफ कोलंबिया (वॉशिंग्टन डी. सी.) यांमधील मतदार अमेरिकेच्या अध्यक्षांची निवड करतात. प्रत्येक राज्याचा अध्यक्षीय निवडणुकीचा कोटा ठरलेला असतो. बहुतेक राज्यांमध्ये रिपब्लिकन आणि डेमोक्रॅटिक पक्षांचे पारंपरिक मतदार आहेत. पक्षीय विभागणी बऱ्यापैकी स्पष्ट असते. मात्र गेल्या काही वर्षांमध्ये काही राज्यांनी नेहमीपेक्षा वेगळा कल दिला आहे. हीच राज्ये निर्णायक ठरतात. त्यामुळे त्यांना ‘स्विंग स्टेट्स’ असे म्हटले जाते.