Encounter : सोमवारी (11 नोव्हेंबर 2024) मणिपूरच्या जिरीबाम जिल्ह्यात CRPF जवानांशी झालेल्या चकमकीत 11 अतिरेकी मारले गेले आहेत. कुकी अतिरेक्यांनी सीआरपीएफ कॅम्पवर हल्ला केला तेव्हा ही चकमक झाली. एनएनआय या वृत्तसंस्थेने दिलेल्या माहितीनुसार, या चकमकीत एक सीआरपीएफ जवानही जखमी झाला आहे.

सोमवारी सकाळी मणिपूरच्या इम्फाळ पूर्व जिल्ह्यात काही अतिरेक्यांनी डोंगराळ भागातून गोळीबार सुरू केला. कुकी अतिरेक्यांनी इम्फाळ खोऱ्यात काम करणाऱ्या शेतकऱ्यांवर हा हल्ला केला. यापूर्वीही कुकी अतिरेक्यांनी शेतकऱ्यांवर गोळीबार केला होता.

या घटनेची माहिती मिळताच सुरक्षा दल तातडीने घटनास्थळी पोहोचले आणि त्यांनी प्रत्युत्तर दिले. यामध्ये एक छोटीशी चकमक झाली. या चकमकीत काही शेतकरी जखमी झाले आहेत. त्यांच्यावर सध्या उपचार सुरु आहेत. त्यांची प्रकृती स्थिर असल्याचे सांगण्यात येत आहे.

11 suspected militants killed in an encounter with CRPF in Jiribam area of Manipur. A CRPF personnel is also critically injured in the encounter: Sources pic.twitter.com/mDoJu2VA3y

— ANI (@ANI) November 11, 2024

शनिवारी (9 नोव्हेंबर 2024) दुसऱ्या घटनेत, शेतात काम करत असताना एका 34 वर्षीय महिला शेतकऱ्याला गोळी लागली. चुरचंदपूर जिल्ह्यातील डोंगराळ भागात हा हल्ला झाला. या हल्ल्यामुळे परिसरात तणाव आणखी वाढला. रविवारी सणसबी, सबुनखोक खुन्नौ आणि थमनापोकपी भागात असेच हल्ले करण्यात आले आहेत.

मणिपूरमध्ये गेल्या वर्षी मे महिन्यापासून सुरू असलेल्या जातीय हिंसाचारामुळे दोनशेहून अधिक लोक मारले गेले आहेत आणि हजारो लोक बेघर झाले आहेत. इम्फाळ खोऱ्यातील मेईती समुदाय आणि आसपासच्या डोंगराळ भागात स्थायिक झालेले कुकी समुदाय यांच्यात हा हिंसाचार सुरू आहे. मणिपूरमधील हिंसाचाराचा इतिहास जातीय आणि राजकीय संघर्षांशी जोडलेला आहे. राज्यातील कुकी, नागा आणि मेईतेई समुदायांमध्ये दीर्घकाळापासून तणाव आहे.

मणिपूरचा मुद्दा स्वातंत्र्य, अस्मिता आणि स्वराज्य यांच्या अधिकारांशी संबंधित आहे. 1990 च्या दशकापासून, मणिपूरमध्ये उग्रवादी समुदायाचा उगम झाला ज्यांनी जातीय रक्षा आणि राज्यापासून वेगळे करण्याची मागणी केली. परिणामी, येथे वारंवार हिंसाचार, गोळीबार आणि लष्करी कारवाईच्या घटना घडत आहेत, ज्यामुळे राज्यातील सामाजिक आणि राजकीय वातावरणात अस्थिरता निर्माण झाली आहे.