Arvind Kejriwal : आज माजी मुख्यमंत्री अरविंद केजरीवाल (Arvind Kejriwal), माजी उपमुख्यमंत्री मनीष सिसोदिया (Manish Sisodia), आम आदमी पक्षाचे नेते दुर्गेश पाठक, विजय नायर आणि बीआरएस नेत्या के कविता दिल्ली उत्पादन शुल्कच्या सीबीआयशी संबंधित प्रकरणात व्हिडिओ कॉन्फरन्सिंगद्वारे राऊस एव्हेन्यू न्यायालयात हजर झाले होते. विशेष न्यायाधीश कावेरी बावेजा (Kaveri Baweja) यांनी या प्रकरणाची पुढील सुनावणी 21 नोव्हेंबर रोजी ठेवण्याचे आदेश दिले आहेत.
11 सप्टेंबर रोजी न्यायालयाने दुर्गेश पाठक यांना एक लाख रुपयांच्या जातमुचलक्यावर जामीन देण्याचे आदेश दिले होते. सीबीआयने अरविंद केजरीवाल यांच्याविरुद्ध दाखल केलेल्या पुरवणी आरोपपत्राची न्यायालयाने ३ सप्टेंबर रोजी दखल घेतली होती. 23 ऑगस्ट रोजी सीबीआयने न्यायालयाला सांगितले होते की, केजरीवाल यांच्यावर खटला चालवण्यास परवानगी देण्यात आली आहे. 10 जुलै रोजी न्यायालयाने ईडीच्या आरोपपत्राची दखल घेत केजरीवाल यांना हजर राहण्याचे आदेश दिले होते. 17 मे रोजी ईडीने सातवे पुरवणी आरोपपत्र दाखल केले होते ज्यात अरविंद केजरीवाल यांना आरोपी बनवण्यात आले होते.
या प्रकरणी आतापर्यंत १८ जणांना अटक करण्यात आली असून त्यात दिल्लीचे माजी मुख्यमंत्री अरविंद केजरीवाल, माजी उपमुख्यमंत्री मनीष सिसोदिया, आम आदमी पार्टीचे राज्यसभा सदस्य संजय सिंह, बीआरएस नेते के कविता यांचा समावेश आहे. या प्रकरणात सर्वोच्च न्यायालयाने केजरीवाल, संजय सिंह, मनीष सिसोदिया आणि के कविता यांना नियमित जामीन मंजूर केला आहे.
