विधानसभा निवडणुकीसाठी राज्यात मतदान प्रक्रिया पार पडत आहे. दरम्यान बीडमध्ये मतदानाला गालबोट लागले आहे. परळी मतदारसंघातील घाट नांदूरगावात मतदान केंद्रात तोडफोडीची घटना घडली. बन्सी शिरसाट या कार्यकर्त्याची गाडी सुद्धा फोडली आहे. दरम्यान, आज सकाळी याच मतदारसंघात शरद पवारांच्या राष्ट्रवादीच्या नेत्याला बेदम मारहाण करण्यात आली होती. मारहाणीनंतर कार्यकर्त्यांनी धनंजय मुंडे यांच्या नावाच्या घोषणा दिल्या होत्या. या घटनेचा व्हिडिओ देखील व्हायरल होत आहे.
मिळालेल्या माहितीनुसार, बीडच्या परळी मतदारसंघात बोगस मतदान होत असल्याची माहिती शरद पवारांच्या राष्ट्रवादीच्या नेत्याला मिळाली होती. यानंतर शरद पवार गटाचे नेते माधव जाधव हे परळी मतदारसंघात बोगस मतदान रोखण्यासाठी गेले होते. मात्र माधव जाधव यांना मारहाण करण्यात आली होती. चार ते पाच जणांनी जाधव यांना मारहाण केली होती. जाधव यांना केलेल्या मारहाणीच्या निषेधार्थ कार्यकर्ते आक्रमक झाले आहे. संतप्त हल्लेखोरांनी ईव्हीएम मशीन फोडले. त्यामुळे मतदान प्रक्रिया ठप्प झाली होती. तीन बूथवर तोडफोड झाली आहे.
दरम्यान या घटनेनंतर पोलीस प्रशासनातील वरिष्ठ अधिकारी घटनास्थळी दाखल झाले. नांदुरघाटमधील तीन आणि चोथेवाडी आणि मुरंबी गावात देखील मतदान केंद्रावर तोडफोड करण्यात आले असल्याची माहिती पोलीस उपविभागीय अधिकारी अनिल चोरमले यांनी दिली. तसंच परिस्थिती नियंत्रणात असून धुडगूस घालणाऱ्यांना अटक केली जाईल, असेही त्यांनी सांगितले.
