Legislature Special Session : महाराष्ट्रात आता नवे ‘फडणवीस सरकार’ अस्तित्वात आले आहे. आजपासून विधिमंडळाच्या अधिवेशनाला सुरुवात होणार आहे.आज सकाळी 11 वाजता विधानसभेचे कामकाज सुरू होणार असून आमदारांच्या शपथविधीला सुरुवात होईल.आज नवनिर्वाचित २८८ आमदार शपथ घेणार असून हंगामी अध्यक्ष कालिदास कोळंबकर हे सर्व नवनिर्वाचित आमदारांना शपथ देणार आहेत.आज दिवसभर आणि उद्या शपथविधी सुरू राहील.तर सोमवारी राज्यपालांचे अभिभाषण आणि नव्या विधानसभा अध्यक्षांची निवडणूक होणार आहे.तसेच राज्यपालांच्या आदेशाने विधान परिषदेची बैठक सोमवारी ९ डिसेंबर रोजी दुपारी ४ वाजता आयोजित करण्यात आली आहे.त्यानंतर 9 डिसेंबरलाच नागपूरमध्ये होणा-या विधीमंडळाच्या हिवाळी अधिवेशनाची घोषणा केली जाईल.

विधानसभेची निवडणूक नोव्हेंबरमध्ये पार पडली होती. २३ नोव्हेंबरला निवडणुकीचा निकाल लागला, परंतु मुख्यमंत्र्यांच्या शपथविधीला तब्बल १२ दिवस लागले. गुरुवारी देवेंद्र फडणवीस यांनी मुख्यमंत्रिपदाची, तर उपमुख्यमंत्रिपदी एकनाथ शिंदे आणि अजित पवार यांनी शपथ घेतली. शपथविधी झाल्यानंतर झालेल्या पहिल्याच मंत्रिमंडळाच्या बैठकीत विधिमंडळाचे विशेष अधिवेशन ७ ते ९ डिसेंबर असे तीन दिवस घेण्याचा प्रस्ताव राज्यपालांकडे पाठविण्यात आला होता. या विशेष अधिवेशनात नवनिर्वाचित आमदारांचा शपथविधी, राज्यपालांचे अभिभाषण आणि नव्या विधानसभा अध्यक्षांची निवडणूक होणार आहे.मावळते विधानसभा अध्यक्ष राहुल नार्वेकर यांचीच अध्यक्षपदी फेरनिवड करण्यात येईल असे सांगण्यात येत आहे. यानंतर रविवारी ते आपला उमेदवारी अर्ज दाखल करतील अशी माहिती समोर आली आहे.

विधान परिषदेचे सभापतिपद दोन वर्षे, तीन महिने उलटून अद्याप रिक्त आहे.सोमवारी विधानसभा अध्यक्षांची निवडणूक होणार आहे. त्याच दिवशी विधान परिषदेच्या सभापतींचीही निवडणूक होणार का, अशी जोरदार चर्चा राजकीय वर्तुळात आहे. दरम्यान विधानसभेच्या अधिवेशनासाठी विधान भवनात रंगरंगोटी करण्यात आली आहे.